Herriko Etxetik Herriko Etxeak jakinarazten du hetsiak izanen direla azaroaren 2an larunbatez. Kontutan hartzeko. Obra batzuk egiteko asmotan Enedis enpresak elektrika mozte batzuk eginen ditu heldu den astelehenean (9:00-11:00). Heraitze auzoa da gehienik hunkitua izanen. Hau ere kontutan hartzeko. Tailer berri CCAS edo Herriko Laguntza Sozialen Zentroak antolatu bilkura iragan da ortzegunean entzule multzo batekin. Bilkura hori sartzen da frantses estatuak jende adinekoen beren egoitzetan laguntzeko xutik emana duen egitarauan. Eliza Hegi xahar etxeko Christine Daguerre zuzendarisak, Pascale Maigne animatzaileak eta Audrey Mardelle psikomotoreak azaldu dituzte 2019-2020 urtean banatuak izanen diren tailer berriak laguntza horien burutzeko. Egitarau horrek ez du bakarrik Uztaritze hunkitzen bainan inguruko herriak ere. Tailer horiek hunkituko dituzten gaiak dira: elikatzea eta dietetika, oroimena, loa eta ongi izaitea, lasaitze eta gimnastika, bakotxak bere baitako konfiantza, bizitegi antolaketa, gizarte lotura eta belaunaldien arteko transmisioa. Tailerrak banatuak dira urri huntarik haste eta heldu den ekaineraino. Gehienak iraganen dira Eliza Hegi xahar etxeko gela berri batean. Tokiak mugatuak izanen dira tailer bakotxean, 8 eta 15 lagunen artean. Argitasunentzat eta izenak emaiteko interesatuek behar dute Aurore Elissalde deitu aski goiz telefono huntara: 05 59 93 38 91. Hirigintza Uztaritzeko hirigintzaren berrikusiaz egina izan den inkesta publikoaren txostena eman du Gérard Voisin komisario inkestatzaileak hautetsieri. Txosten eta ondorioen berri jendeak har dezake Herriko Etxean berean edo herriko webgunean. Mus lehiaketa Heraitzeko besta batzordeak mus lehiaketa bat antolatzen du azaroaren 2an larunbatez Auzobaitako eraikuntzaren ezker paretan. Izen hartzeak hasiko dira 14:00etan eta lehiaketa bera 15:00etan. Ondotik afari bat izanen da parte hartzailentzat: aratxeki axoa lursagar fritatuekin. Asko opari badira lehiaketa hortan irabazteko. Inbido eta hordagoak libro. Antzerki ''Herriko bozak'' Piarres Larzabal zenaren antzerkia emana izanen da igande huntan urriaren 27an (17:30) Arruntza auzoko Erdiko Etxean (pilota plaza ondoan) Iguzki Lore antzerki taldeak emanik. Maika Etchecopar dute taula zuzendari. Sartzea 10 eurotan finkatua da. Ongi etorri deneri.