Etxalar eta Sararen arteko akordioa

Leizarretako lepoan buruilaren 24an izan da mugimendu. Etxalarreko Xabier Etxarte eta Sarako Battitt Laborde auzapezek, biek elkarrekin "uso" ihiziarentzat akordioa izenpetu dute, ihizi mota hori egiten baita bi herrien eremuetan. Egun hortan egin dituzte joko batzu, bota-luze eta karrota botatze, bazen ere lantegi frango beren ekoizpenekin, ondotik bazkaria, ahatxekia kanpoan errea, 300 bat bazkaltiar baziren, eguna bukatu da dena umore onean.

Kalaka

Sarako Lezeetan Kalaka taldeak hiru kontzertu eskainiko ditu, urriaren 6, 7 eta 8an (21:00).

Erretretatuen ateraldia

Aurten ateraldia Bardoze eskualdean dugu, urriaren 11n asteazkenez. Igeritegiko aparkalekutik (8:30) autobusa abiatuko da, bidean gosaria eginen da. Bardozeko Bastidara esnetegia bisitatuko da, bazkaria Bastidako "Les Arceaux" jatetxean, herrira itzuli eta, azken tragoa Herriko Etxeko edantegian eginen da, Sarako gazteriak ofreiturik. Hortako zuen izenak behar dituzue urriaren 6a aitzin eman, Herriko Etxea deituz: 05-59-54-20-28, izena ematean ordaindu beharko da: 30€ bakarrik denak edo 45€ bikoteak. Bertzalde ateraldi egunerako, norbait zuen bila etortzen ahalko da, hortako izena ematean abisatu behar da. Ahal duzuen guziek etorri egun goxo baten pasatzera, denek elgarrekin.

Pilota trinketean

Lehen maila: Elgart Vincent-Haroçarene Arnaud 24-40 galtzaile Amikuzeren kontra. 2. maila: Iribarren Unai-Lecuona Aritz 40-14 irabazle Mauleren kontra. Mariluz Julen-Etcheverry Unai 40-18 irabazle Zaharrer Segiren kontra. Mougica Iban-Haroçarene Olivier 40-18 irabazle Abarratiaren kontra. Gurruchaga Betti-Calvet Daniel 40-20 irabazle Itsasuarrak-en kontra. 3. maila: Endara Denis-Iribarren Oihan 22-40 galtzaile Zaharrer Segiren kontra. Alfaro Ellande-Elizalde Lauran 40-16 irabazle Zaharrer Segiren kontra.

Errugbia

Mutikoek Euskadiko txapelketa utzi dute eta aurten berriz Frantziako txapelketaren kontu hasi dira. Igandean Sarak 24-20 irabazi du Mourenx-en kontra. Neskek beren sasoia Euskadiko txapelketaren kontu segitzen dute. Igandean Donostiaren kontra galdu dute. Aste huntan mutikoak larunbatean ariko dira (20:00) Lons-en kontra eta neskak larunbatean (17:00) Elorrioren kontra.