Egun eta bihar | 2023ko Urriaren 05a
Autonomia beraz
J-B D
Emmanuel Macron lehendakaria berriz Korsikan izan da eta frangok arras uste-gabekoak kausitu dituzten solas zonbait erabili ditu. Deplauki erranez uharte horrek hartze duela bere gisako autonomia. Frango bazirela, eta beti badirela, hitz horren beldurra bezala badutenak, Macron ez da beraz batere hortarik ari. Hots, iduri du zinez denborak kanbiatu direla eta ez guti. Horiek hola, garbiki erran du bestalde Korsika ez dela Frantziatik berexiko, autonomiarekin ez dela nihundik ere izanen hokako haustura edo urrakorik, bainan lotura azkar-azkarra, denen onetan hori dela arrunt beharrezkoa. Dena den, korsikar abertzale aitzindariek hein bat untsa hartu dituzte Macronen solasak, ondorio hautak ukaiten ahal dituztela, aitzinamendu baliosak oro har. Espantu handirik egin gabe halere denen buru. Ez baita oraino hortaratzeko sasoina. Hola mintzatu da besteak beste Gilles Simeoni. Zonbait hilabetez bilkurak eginen dira hobeki aztertzeko nun zer nola egiten ahal litakeen, gero deputatu eta senatorek trenkatzeko aspaldian minbera den auzi hori. Istorio horrek ukanen du gisa guziz oraino ere aipaldi frango hor gaindi, agian zalaparta eta kalapita handiegirik gabe. Den hoberenetik, bazterrak untsa lasaitu aitzin, kausituko da hain segur traba asko eta asko, egun hobeak jinen direlako esperantza azkartu bada halere nolazpait, hori bera ez da guti azkenean. Korsikar mintzaira ere aise hobeki lagunduko omen da. Ederki hori bainan euskara, bretoia eta gisa bereko beste mintzairak, zer dira beti hein berean atxiki behar? Ez direa gutaz trufatzen hor nunbait?
