Aihertar lasterkariak Donamartirin

Mendi lasterketek arrakasta handia bildu dute bazter guzietan azken urte hauetan, eta Euskal Herrian ere. Badu urte parrasta bat, 40 bat urte menturaz, urte guziz edo urte gehienetan bederen DonamartirikoBelhorritz elkarteak antolatzen duela azaroan "Behobia Donostia" lasterketa famatutik landa, 13 kilometroko lasterketa Donamartiriko mendixketan. Aurtengo berezitasuna da lehen aldikoz bi lasterketa antolatu dituztela, bata 13 kilometrokoa orain arte bezala, eta bestea 20 kilometrokoa. Horrengatik ditaike hain segur sekulan ez bezainbat lasterkarik parte hartu dutela aurten, eta horietan 4 aihertar gaztek. Nahiz eta ez duten 20km-ko lasterketa irabazi, denbora ona eginez bururatu dute lasterkaldia, erakutsiz forma onean direla lauak. Biba zuek!

Igandean ikastolako haurrak eta Otxalde taldea

Heldu den igandean, arratsalde goxo baten pasatzeko parada proposatua zauku, Ezkia ikastolaren alde antolatzen duten kantaldiarekin. Denen Etxeko gelan iraganen da. Lehen partean (15:30) Ezkia ikastolako haurrek emanen dituzte ikastolan ikasi Otxalde taldearen kantuak. Bigarren partean (16:00) Otxalde taldearen emanaldiaren aldi. Oren bat et’erdiz kantu bidaia alai eta goxo baten egiteko parada proposatuko dute. Otxalde taldearen kantu gehienak alaiak dira, girotsuak eta ederki musikatuak. Arrazoi bat gehiago talde hunen ikustera jiteko!

Kantaldiaren ondotik, burasoek prestatu taloak eta zerbitzatu edariak tokian berean hartzen ahalko dira edo ikusgarria bukatzean etxera eramaten ahalko. Ongi etorri deneri!

Txartelak 10€tan (12 urtetik gora) erosten ahal dira aitzinetik Hello Asson, edo Hazparneko Xuriatea ostatuan eta Lurra Bio dendan. Txartelak 12€tan tokian berean erosten ahalko dira.

Zer? Noiz? Nun?

Abenduaren 1ean, Eguberriko merkatua iraganen da Izturitzen, Arberoa ikastolak antolaturik (10:00-15:00): tokiko ekoizleak, haurrentzako tailerrak, marrazki biziduna (11:00), tokian berean jatekoa eta edatekoa.

Abenduaren 21ean, sustengu kontzertua Aiherrako Denen Etxean, Arberoa ikastolaren alde: zintzur bustitze alaitua (20:00) Ixtaklok, Su Ta Gar taldea (22:30), DJ Elepunto (00:30).