"Elgarrekin" gizon korua

Elgarrekin gizon koroak sasoin ezin hobea iraganik programa berri baten egiteko garaia du. Denetan gertatzen den bezala kantarien joan jin bat bada taldean eta "ténor eta basse" kantariak eskas ditu. Horien ekarrarazteko bi elgarretaratze goxo apailatu dituzte berriki. Horietara joaiteko parada ukan ez duenak oraino ongietorria ukanen du eta taldearekin harremanetan sar daiteke ondoko zenbaki batetara deituz: 06-83-56-16-15 edo 06-08-72-46-60.

Telethona

Berriz ere hor da telethona azaroaren azken asteburu huntan. Ostiralean hasiko da eskoletako haur eta gazteen parte hartzearekin: Xapitalian San Josep eta Armand David lizeoetako gazteek laster eginen dute. Berantago eskolek, Amañoak eta Irriñoak haurtzaindegietakoak ibiliko dira karriketan Euskal Herriko Semeak elkarteko motodunek lagundurik. Larunbat goiz guzian moto ibilaldiak eta auto zahar erakusketa, suhiltzaileek proposatu jokoak haurrentzat eta haien kamionean ibiltzea (eliza saihetseko eta Harana plazetan). Entsenian aldiz ball-trap eta bazkaria Haitzaldeak antolaturik. Igandean (9:30-13:00) Cross-a Urtxintxak elkarteak apailaturik Armand David lizeoan. Mendeala gelaren ondoan diren plaza ttipietan auto erakusketa eta tonbola izanen dira. Adinekoek ere Beti Gazte elkartearekin parte hartu nahi dute bazkaria antolatuz abenduaren 5ean. Izena eman 06-26-77-21-16 zenbakian.

Eguberriko erosketak

Eguberri hurbiltzearekin herriko artisau eta komertsantek Herriko Etxearen laguntzarekin, Hazparnen berean eros daitekeenaren katalogoa atera dute. Hortan kausi daiteke nehorat joan gabe sasoin huntan egiten diren erosketak hurbil egiteko moldea. Herria bizirik atxikitzeko, herrian erosi behar dela oroitarazten digute. Paperez agertzen da edo Hazparne herriko webgunean ere.

Ezkia ikastolaren kantaldia

Otxalde taldea izanen da ikastolak antolatzen duen kantaldiaren bigarren partean. Lehen partean Ikastolako 130 haurrek emanen dituzte talde horren kantu batzu. Ondotik izanen da jateko eta edateko tokian berean. Abenduaren 1ean, Aiherrako Denen Etxean (15:30).