Duela bi urte bezala, Korrika aurten ere berriz abian da, bere 24. edizioarekin. Martxoaren 19an abiatuko da Atharratzetik (15:30), eta 29an arribatuko da Bilbora (12:04). Aurtengo edizioak nehoizko parte-hartzaileena izatea du helburu. 2.175 kilometro eginen ditu aurtengo ibilbideak, eta 3.436 lekuko hartze izanen dira. AEKk antolaturik, Korrikak euskara ikusaraztea, euskal komunitatea aktibatzea eta hizkuntzaren aldeko aldarria plazara ateratzea du xedetzat. Euskal Herritik haratago ere, mun

Korrika Munduan

Korrika Munduan Euskal Herritik kanpo antolatzen diren Korrika herrikoiak dira, bertako Euskal Etxeek, euskara ikasle, irakasle eta laguntzaileek sustatzen dituztenak. Nahiz eta formatu ttipiagoan egin, sinbolikoki biziki azkarra da, euskararen aldeko mezua mundu osora zabaltzen baita, diasporako euskaldunak saretuz.

Munduan zehar milaka pertsona ari dira euskara ikasten eta erabiltzen. Korrika Munduan ekimenari esker komunitate hori indartzen da, ikusgarritasuna emanez eta elkartzeko parada eskainiz. Gertatzen da Korrika Munduan urteko hitzordu garrantzitsuenetarikoa izatea bertako euskaltzale batzuentzat.

Ekimen horiek zubi lana egiten dute Euskal Herria eta munduko euskal komunitateen artean, loturak eginez eta duten sentimendu partekatua aberastuz.

AEKrentzat eta Korrikarentzat, Korrika Munduan funtsezko zutabea da, euskararen aldeko mugimendua globala dela erakusten baitu, hizkuntza komunitatearen indarra erakutsiz.

Korrikaren Ahizpak

Euskal Herritik haratago, munduko xoko anitzetan ere Korrikan inspiraturiko ekimenak antolatzen dira, “Korrikaren Ahizpak” deitzen direnak, horietan bretoiera, katalana eta okzitanieraren alde.

Aurten hiru hitzordu egonen dira: katalanaren aldeko Correllenguarekin, apirilaren 19tik maiatzaren 5era, okzitanieraren aldeko La Passemekin apirilaren 30etik maiatzaren 9ra eta bretoieraren aldeko Ar Redadegekin, maiatzaren 8tik 16ra.

Hiru Ahizpa horiek 24. Korrikan parte hartzea aurreikusia da eta lekukoa eramanen dute Bilbon.

Aurtengo edizioaren inguruko xehetasun guziak korrika.eus webgunean aurki daitezke, izan Euskal Herrikoak edota munduan zeharrekoak.