Heriotze

- Berthe Landabourou (Lagrave sortua) adin ederrean joan zauku. 99 urtetan zendu da erretreta etxean. Baigorrin ezkondua, Bigorre eskualdeko Juillan herrikoa zen sortzez.

Doluminak Roger semeari eta familiari.

- Aspaldian Donibane Garazin bizi zen Marie Bernadette Arsa pausatu da 66 urtetan. Gure herrian sortua, Marie Bernadettek bere gazte denbora Baigorrin iragana zuen ama eta anaiekin. Dolumin bizienak Jean Marie anaiari.

Euskal Herriko mus txapelketa

7 lurraldeen arteko txapelketaren kondu, Baigorriko partidak Manexenean jokatu dira joan den igandean, Baxe Nafarroako finalarentzat sailkatzeko (martxoaren 7an, Izturitzen). 2 talde joanen dira gure herritik: Beñat Jauretche-Ana Luro eta Pantzo Hirigarai-Paul Dupuy. Goresmenak kalifikatueri!

Abisu bat Bankari lotua

Informazio bilkura baten berri. Bankatik pasatu balin bazirezte, ikusia dukezue obrak egiten ari direla herrian sartzean den Olha gunean. Altxatu diren bastiza berriak lan eremu bilakatuko dira. Han izanen dira bulegoak, ko-working edo elkarlan eremua, bilkura gelak, zerbitzuak eta mediku sozial permanentziak. Gehiago jakiten ahalko da otsailaren 26an Baigorriko Herriko Etxean eginen den bilkuran (18:30).

Deneri idekia da, enpresak, proiektu eremaileak, elkarteak biztanleak eta beste… Euskal Elkargoa eta Aiba elkartea antolatzaile.

Irakurketa taldea

Hitzordu bat proposatzen dauku Baigorri, Ortzaize, Garazi, Aldude (BOGA) irakurle taldeak. Amaiur Epherre gomitatzen du Bixentainera, "Haize Beltza" bere liburuaren aurkezteko. Otsailaren 27an, ortziralez (19:00).

Urak goratu

Urak azkarki goratu ziren aitzineko egunetako euriekin. Horren lekuko, luzaz agorturik egona zen Izpegiko bide bazterreko ur jauzi hunen indarra!