Josiane Aguerre-Valenciak eta Philippe Alborrek, duela hiru urte plazaratutako Biribil obraren ildo beretik, gaur Barnetik izeneko obra berria dute plazaratzen, Ikas pedagogia zentroak argitaraturik.

Josiane Aguerre-Valenciak eta Philippe Alborrek, duela hiru urte plazaratutako Biribil obraren ildo beretik, gaur Barnetik izeneko obra berria dute plazaratzen, Ikas pedagogia zentroak argitaraturik. Josianek du haur kantu bilduma berri hau sortua, testu eta ilustrazioak (15 kantu). "Argazki batetik abiatu da proiektua, digu erran Josianek, kartoin barnean ari nintzela josteta; kartoina etxe bilakatu da eta bidaiatzeko tresna bihurtu". Philippe Alborrek du musika landu. Diskoaren grabaketan saihetsean zauzkaten Haurrock taldeko sei kantari: Laia Lapeyrade, Betty Barrau, Lili Courtois, Iliez Fakri-Fautoux, Xan eta Maialen Aphezteguy-Mailharo. Patrick Fischerrek du grabaketa segurtatu, Philippe Alborren ondoan musikari bezala ere parte hartuz, saihetsean zituztela ere beste bi musikari, Xabi Etxeberri eta Haize Albor. "Biribil obra maitatu dutenek, Barnetik obra berria ere maitatuko dute, biziki gustukoa ukanen dute, ez da dudarik" zaigu errana izan. Aitzinekoa bezala, maleta barnean aurkitzen den liburu-diskoa da Barnetik, horiez gain testuak eta ilustrazioak izari handitan publikatuak daudela, ikastetxetako irakasleek beren ikasgeletan balia ditzaten, bereziki hizkuntzaren lantzeko, kantuez gain erhi jokoak ere egin daitezkeela. Liburutegi eta haurtzaindegietan ere erabil daitekeen altxorra. Euskararen Erakunde Publikoaren eta Hazkunde Nazionalaren laguntzari esker, urririk zabalduko da obra hori Ipar Euskal Herriko ikastetxetan. Bertze guziek, aldiz, liburu-disko dendetan aurkitu dute, liburu-diskoa 15 eurotan eta maleta osoa 35 eurotan.