Larrazken huntan, Oldarra abesbatzak Frantziako monastegietan gaindi ibilaldia egiten ari du, kantaldiak eskainiz euskaraz bezala latinez edo frantsesez.

Larrazken huntan, Oldarra abesbatzak Frantziako monastegietan gaindi ibilaldia egiten ari du, kantaldiak eskainiz euskaraz bezala latinez edo frantsesez. Kantatuz bietan otoizten dela eta, kantaldi bereziak dira, gainera dohainik eta kartsutasun eta isiltasunean emanak... Jadanik, duela hain xuxen 10 urte, Konpostelako beilabidea egin zuten Oldarrako kantariek, beilaren hiri nagusietan 10 bat kontzertu eskainiz, azkena Konpostelan berean. Aurten frailetxetan gaindi egiten ari duten ibilaldia, urriaren 14an abiatua dute, La Pierre qui Vire, Yonne departamenduan kokatzen den Beneditanoen abadian. Biharamunean Ignyko serorategian eman dute kontzertua, jende ainitz bilduz kartsutasunean. Bidenabar Xanpainako eta Borgoinako eskualdeak ere bisitatu dituzte, hango arno onak jastatuz eta sotoak bisitatuz. Ondotik Sainte-Marie-du-Désert, Tolosa ondoko Beneditanoen abadian kantatu dute. Azaroaren 12an Tourseko basilika ederrean ziren, Jondoni Martinen hilobia gordetzen duen basilika mukuru betean. Betharramen azaroaren 19an, Ligugeko abadian eta Rionseko Broussey abadian azaroaren 25ean eta 26an jarraituko du ibilaldiak. Bururatzeko, Beloken emanen dute azken kantaldia igandez, abenduaren 10ean. Nola ez, beren errepertorioan besteak beste aita Iratzeder eta Etchehandyren olerkiak kantatzen dituzte-eta, Urteagak edo Olaizolak musikatuak.