Joan den ostiralean iragan da Herrikoa sozietatearen biltzar nagusia, Herriko Etxeko Arrume gelan.

Joan den ostiralean iragan da Herrikoa sozietatearen biltzar nagusia, Herriko Etxeko Arrume gelan. 70 lagun inguru da karia hortara bildu. Marie-Claire Sallaberry Herrikoako kudeatzaile nagusiak iragan urteko harat-hunatak aipatu dauzkigu: azken urtean 53 enpresa proiektu zaizkio Herrikoari presentatu, horietarik 18 segitu ditu eta 14 funski lagundu (160 lanpostu), 815.000 euro inbestituz. Hemengo ekonomia indartzeko asmoz, Herrikoak 1980an bere ildoa abiatuz geroztik 3.289 lanpostu sortzen edo bermatzen lagundu du, enpreseri dirua ekarriz. Hortarako akziodunak behar ditu eta gaur 4.433 akziodun partikular baditu eta bertzelako 81 akziodun (elkarte, enpresa, institutu eta banku). Aurten 41 akziodun berri zaizkio juntatu. Joset Bergara Txistu konduen kudeatzaileak urteko konduak dauzkigu presentatu (uztailaren 1etik ekainaren 30era doa kondualdia). Urteko irabazi garbia 82.735 eurokoa izan da. Arthur Lesgourgues kondu ikuskatzaileak osoki egiaztatu dituen konduak. Peio Bellan Zaintza Kontseiluko lehendakariak (Conseil de Surveilllance) Herrikoan dena oneski eta sanoki doatzila du baieztatu, deitoratuz haatik diruz lagundutako lau enpresek ateak hetsi behar izan dituztela aurten (bilan pausatze), tartean bi kooperatibek. Txosten morala eta diru-konduak aho batez onetsi ditu biltzarrak eta bururatzean Zaintza Kontseiluaren berritzea izan da: beren mandatua bururatzen zuten hiru kidek (Caroline Phillips, Gérard Ducam, Jean-Louis Harignordoquy) onartu dute bertze hiru urtez aitzina segitzea, Andoni Iturriozek haatik bere lekua utzi du eta bi kide berri sartu dira, Andere Nahiako MariePierre Arrieta eta Irulegiko Sotoko Nadine Gaztambide. Biltzarra bururatu-eta, gehiengoak afari gozagarri batez du gaua aitzina segitu Iparla ostatuan.