Gutitan aipatzen dugu hemen Peruko euskaldunen berri eta gaurkoan heldu zakote txanda.

LIMA, PERU

Gutitan aipatzen dugu hemen Peruko euskaldunen berri eta gaurkoan heldu zakote txanda. Munduko beste hameka euskal etxetan bezala, ospatu berria dute Limako Euskal Etxekoek Euskararen Nazioarteko Eguna. Xabier Gil nafartarra dute duela hiru bat urte euskara irakasle. Bikote perutarra duen iruin semea da Xabi, eta euskara irakaslea izateaz landa, euskal etxe barneko LEGAZ (Limako Euskal Gazteria) gazte taldeko koordinatzaile da. Laborantza eta ingurumen ikasketak ditu eta hortan dabil lanean Perun, indigenekin. Euskal Etxeak ere, Euskal Herriko besta nagusiak ospatzearekin batera, Danborrada, Korrika, eta Mercomus nazioarteko mus txapelketa ere antolatu ditu aurten, eta oihaneko indigenekin elkartasuna ere landu du, 'Eguberria Oihanean' ekimenean laguntzaile izanik, hainbat material erosi edota bildurik, gero herrialde barnean bizi diren gazte indigena beharduneri emateko.

RENO, NEVADA

Eguberriko data berezi hauetan girelarik, eskaintza berezi bat abiarazi du Nevadan, William Douglass Euskal Ikasketa Zentroak (WDCBS, Center for Basque Studies) eta %25etik %50era bitarteko beherapenak eskaintzen ditu webgunean salgai dituen liburu guzietan, aspaldikoetan eta egungoetan. WDCBSek argitaratzen dituen liburuak Euskal Herriari edo euskal kulturari lotuak dira beti, eta publiko ingelesdunak euskal gaiez bere hizkuntzan irakurtzeko duen baliabide inportanteena dira. Bere "The Basque Soul Collection" bilduman, konparazio, bost azken liburu eskaintzen ditu, tartean Denise Orpustan-Loveren 'The Mill House speaks' (Eihera mintzo), Juan Madariagaren "Anthology of Apologist and Detractors of the Basque Language" (Euskararen aldeko eta kontrakoen antologia) eta Gabriel Arestiren "Downhill eta Rock & Core" (Maldan Behera eta Harri eta Herri), bost liburu interesgarri 50 dolarretarik beheiti, prezio erdian. Aukera ona da irakurtzeko edo Eguberriko opari gisa beste norbaitentzat erosteko. Ikus basquebooks.myshopify.com-en.

Bestenaz, urteko ondar egun hauetan, apaldua da euskal etxe gehienen aktibitatea. Badira oraino Olentzero iragan asteburuan errezibitu edo Eguberri eta Urte Azken elgarretaratzeak egin ditutenak, hala nola Chino-Kalifornian, Buenos Airesen (Euskaltzaleak), Habanan, Londresen, Atlantan, Madrilen, Corpus Christin, Bruselan, Boisen, New Yorken, Viedman, Bordelen (Eguberri merkatua)... guti batzuk aipatzeko; edo aste huntan San Tomas feira ospatuko dutenak, txorizoa edo txistorra jaten, hala nola Necochean, Madrilen... Heier eta zuhaurri, irakurle, zorionak, agiantza onenak eta mila esker handi bat Diasporaren xoko hunen jarraitzaile izateagatik. Ongi pasa egun hauek, eta berehala arte, Donostiako danborradako azantza ate joka baitugu hemen berean den urtarrilean. Besarkada eta izan ontsa!