Hedabide guzietan noiznahi aipatzen da Jerusalem, gutien ustean bazterrak minbera baitaude han gaindi.

Hedabide guzietan noiznahi aipatzen da Jerusalem, gutien ustean bazterrak minbera baitaude han gaindi. Aitzineko aste hortan, sukar samin bat berriz jauzi da, Donald Trump amerikano presidentak sua pizturik. Jakin-arazi du alabainan amerikanoek Israel herrialdean duten enbaxadorearen egoitza lekuz aldatuko dela, eta joanen beraz Tel-Aviv hiritik Jerusalemerat. Gisa hortan amerikano lehendakariak aski deplauki erakusterat emaiten du Jerusalem daukala Israelgo hirinagusi. Juduen atsegingarri bainan palestinarrentzat gauza bat ezin onetsia. Egia erran, badu urteak eta urteak - zonbait hamarkada - auzi hori ezin zurituz ari direla. Funtsezko aitzinamendurik batere gabe haatik... Palestinarrek ere Jerusalem baitaukate beren hiri nagusi bainan juduek orainokoan segurik ez aditu ere nahi holako aldarrikapenik! Nazioarteko Erakunde Nagusia entseatzen da aterabide baketsu baten sustatzerat. Urteak jin eta urteak joan, gisa hortako dei frango zabalduak izanak dira bainan gauzak ez dira kanbiatzen, baditake gero eta okerrago ere diren. Ainitzen gustuko Trump presidentaren joka-bide bihurri horrek traba gehiago baizik ez du ezartzen bake iraunkor baten arrangura dutenentzat...

Bi zatitan

Jerusalem hiriaren geroak ez ditu uste-gabetarik kezkatzen bazterrak. Jakinaren gainean Jerusalem hiri saindu bat dela judu, giristino eta musulmanentzat, hots zabaldura handia duten hiru erlisionerentzat. Ez dugu xeheki kondatuko hiri horren istorio luzea. Duela berrogoi bat mende sortu zen hor herrixka bat. Orduan ez zen eskualde hortan ez judurik ez arabiarrik, ez eta bistan da giristinorik, Jesus ez baita handik hogoi menderen buruan baizik etorri... Han gaindi bizi zirenek bazuten beren sineste berezia eta adoratzen zuten Shalem izeneko jainko bat. Hiriaren izena bera jainko horrenetik heldu da, izenak erran nahi historialari gehienen gustuko segurik "Shalemek gerizatzen duen bizitokia". Gero jin ziren juduak, berantxago arabiarrak bai eta beste jende mota asko. Jerusalem hirinagusi ekarria zen David erregearen denborakotzat. Geroztik, zonbat gora-behera, zonbat zalaparta eta zonbat eztabada samin! Gaurko egunean, 882.000 biztanle, iaz egin kondaketaren arabera. Jendetza azkarki emendatu da 70 urte barne, bainan azken urte hautan hein bertsuan dago. Ikerleek diotenaz, % 61 juduak dira, %36 musulmanak. Giristino guti da han berean bizi, hamar bat mila tira-hala, bainan giristino ainitz jiten dira urte guziz beilatiar kondu.

Aspaldian, hiria bi zatitan da. Ekialdeko eskualdean jende gehienak palestinarrak dira. Eskualde hortan kokatzen da hiri zahar guzia, bere karrika hertsiekin, dena harresiz inguratua, hor dira ere giristinoen beilatoki aipagarrienak, besteak beste Hobi Sainduaren eliza, Jesus hobiratua izan zen tokian eraikia. Horiek hola, 1967an izan zen sei eguneko gerlaren ondotik, Israelek menperatua dauka hiri guzia, hiri zaharra barne beraz. Nazioarteko biltzarretan kasik nehork ez badu ere onesten menperatze hori. Geroztik, zonbat istorio eta zonbat tirabira! Noiz nola helduko ote dira akomeamendu on batetarat? Paperean, ez luke alta iduri hain zaila litakeen. Israelek utz dezala ekialdea palestinarreri, bi herrialde izan ditela elgarren ondoan, biak onartuak nazioarteko erakundeetan, bakoitzak bere gain Jerusalemeren parte bat eta Jerusalem bien hirinagusi. Batzuk diotelarik on litakeela beharbada lur xirrizta bat, beila-toki ezagutuenekin, ez Israelen kondu izaitea, ez eta Palestinaren, Nazioarteko Erakunde Nagusiak kudeatuz. Horra zer izaiten ahal litazkeen aterabide manerako baten zimenduak. Zoritxarrez erraitea da erretxenik, mila estakuru hor dira berehala aitzinamendu guzien grabatzeko...