Ez da lehen aldia, Bilboko Guggenheim museoaren zuzendaritzak bigarren museoa irekitzea, Gernika aldean, aipatzen duela. Duela urte zenbait, Busturia-Sukarrieta kokalekuak aipatuak izan ziren, baztertuak izan zirenak. Jaurlaritzatik jakinarazi dute, egiten balinbada, 2019a aitzin ez dela deus eginen, Jaurlaritzak beste lehentasunik izanez eta gogora ekarri dute proiektu hori abian jartzeko "adostasun maila oso handia eta erakundeen babesa" behar dela, eta "une honetan ez gaude puntu horretan".

Espainiako presondegi zuzendaritzak baztertu ditu ETAko 54 presok lehen gradutik bigarren gradura pasatzeko azken astetan egin eskaerak. Lehen gradua kartzelako erregimenik gogorrena da, eta maila horretan dauden presoek ezinezkoa dute baldintzen hobetzearen galdea. Baimenak edo onurak eskatzeko ezinbestekoa da bigarren graduan egoitea. Erabaki honekin, preso onurak eskatzeko bidea hetsi die Espainiako Gobernuak. ETArengandik urrundu ez direla eta erakunde armatua desegin ez dela, izan dira preso horien eskakizunak baztertzeko argudioak.

Elkar Fundazioak eskatuta, Siadeco ikerketa etxeak euskal herritarren irakurketa eta musika ohiturak aztertu ditu, "Bizkaia, Gipuzkoa, Nafarroa, Araba eta Ipar Euskal Herriko" 2.500 laguni inkestak eginez. Irakurtzeko ohiturei dagokienez, hamar euskal herritarretik zazpik irakurletzat duten beren burua liburu bat irakurri dute azken sei hilabeteetan. Euskarazko liburuei dagokienez, euskal herritarren %11k irakurtzen dituzte euskarazko liburuak. Euskaldunok euskaraz ez irakurtzeko arrazoi nagusia, "errextasun falta" da nagusiki.

Botere Judizialak argitaratutako datuen arabera, 767 salaketa gehiago izan ziren 2017an, 2016an baino: %11 gehiago.

2018ko uztailean Euskal Herriko herrialde guziak zeharkatuko dituen espedizio gaztea antolatu du Euskar Abentura elkarteak, Jondoni Jakue bideak jarraituz eta Unescok izendatutako gizateriaren ondareetatik pasatuz, 16-17 urteko 120 gaztek esperientzia "ahantzezina" biziko dute datorren udan, antolatzaileek diotenez.

Manifestazio erraldoiak eta historikoak egin dira asteburuan, Hegoaldeko hiriburuetan, baita espainar estatuan zehar, erretretan direnentzat pentsio duinak eskatuz Madrilgo gobernuari. Bilbon, udaltzaingoak dionaz, 100 mila pertsonaz goiti bildu dira. Halaber beste hiriburuetan, Donostia, Gasteiz edo Iruñean. Pentsio duinaren eskubidea aldarrikatu dute: gutienez 1.080 euroko pentsioa hilabeteko. Pentsiodunek hilabeteak daramatzate astelehenero kalean manifestatuz. Saminki kritikatu dute Rajoyren gobernuak entzun gogor egiten diola beren eskariari. 2018an erretreta pentsioa banabeste urteko 11.044,6 eurokoa da, hots, hilabeteko 788,9 eurokoa. Ezinbizia diru horrekin. Bizkaiko Pentsiodunen Mugimenduaren arabera, Euskadin 190 mila pertsonek bizirauten dute hilabetean 700 euro baino gutiagorekin, gehienak emazteak

Hezkuntzako milaka langilek greba egin dute eta kalera atera dira, ELA, LAB eta Steilas sindikatuek deiturik. Sare publikoko erakasleek baliabide gehiago eta laneko baldintzen hobetzea eskatzen dute. Mugimenduak jarraipen nabarmena izan du: %75ekoa sindikaten arabera. 26 mila erakasle zeuden grebara deituak.

Euskal hiztunen aktibazioa izanen du helburu Euskaraldiak. Ekimenak, larrazkeneko 11egunez, euskararen gehiago erabiltzea bultzatuko du. Hamaika egun horietan, 16 urtetik gorako herritarrak Ahobizi eta Belarriprest bihurtzea da helburua. Ahobizi, ulertzen duten guziei euskaraz hitz egiten dieten lagunak dira. Belarriprest, berriz, gutienez euskara ulertzen duten kideak dira, gaineratekoei euskaraz aritzeko gonbidapena luzatzen dietenak. Hasia dago Euskaraldian parte hartzeko herrietako batzordeen izen-emaitea. Epea zabaldu zenetik, gelditu gabe ari dira herri berriak gehitzen aurtengo azaroaren 23a eta abenduaren 3aren artean Euskaraldia martxan izanen duten herrien zerrendara.