RENO, NEVADA. John Ascuagaren Nugget kasino famatuan urtetan egon zen Euskal Artzainaren estatua, Nevada-Renoko Unibertsitatera aldatu dute joan den astean. Oroit dezagun Nugget kasinoa Reno ondoko Sparks-en dagoela eta duela urte batzuk saldu egin zuela Ascuaga familiak. Kasinoko Orozko jatetxearen [John Ascuagaren aita Orozko herri bizkaitarrekoa zen; Ascuagaren emazte Rose (Ardans) buraso baxenabartarren Ameriketan sortu alaba da] kanpoaldean zen estatua hau hor egon da geroztik, baina jatetxea ere izenez eta izanez aldatu zutelarik, estatuak bere erro eta loturak galdu zituen inguruarekin, eta kasinoak Unibertsitateko Euskal Ikasketa Zentroari eskaini zion. Orain, bisitatu nahi duenak, Unibertsitateko Euskal Ikasketa Zentroaren alboan harrapatuko du. Brontzezko euskal artzain bat eta bere zakurra erakusten ditu, eta zerikusirik ez du Nestor Basterretxea zizelkariaren Renoko Euskal Artzainaren Monumentuko estatuarekin, hau Renoko Rancho San Rafael parkean kokatua.

SAN FRANTZISKO, KALIFORNIA. Joan den igandean behar zuen agitu San Frantziskoko Euskal Etxeak urte guziz Petaluman egiten duen piknik besta, orain koronabirusagatik utzia. Interneten, Zazpiak Bat euskal dantzariek dantzaldi ederra eskaini zaukuten ordainean bakotxak bere lekutik. Biba ziek! Ber denboran, aita Antton euskal omonierak meza eman zuen online euskaraz eta ingelesez, besteak beste euskal komunitate barnean azken egunetan zenduak gogoan. Hor aipatu zituen Jean Acheritogaray ortzaiztarra, San Frantziskon; Chino-Bakersfield-en, Isidore Camou uztariztarra; eta Idahoko Caldwell- en, Leonard Mallea, buraso bizkaitarren seme. Gure doluminak heien familieri eta euskal komunitatean eri edo bakardadean direneri. Gogoratu (zuendako edo zuen inguruan jakin nahiko luketenendako) aita Anttonen mezak euskaraz eta ingelesez, Euskal Herritik ere segitzen ahal direla interneten, igandetan, Kaliforniako goizeko 9etan (EHko arratsaldeko 6etan) St. Patrick’s Parish and Our Lady of Mercy-ren Facebook-ean.

‘EUSKARA MUNDUAN’. Hala du izena Diasporan euskara irakasleak formatzeko Etxepare Euskal Institutuak abian duen programak. Urtean bitan barnetegiak egiten dituzte, heien ikaskuntza prozesuan hobetzeko. Orain, koronabirusarekin, ez da posible, baina aitzina egitea deliberatu dute, eta barnetegiak online egitea, eta hala eginen dute. Heldu dena, uztailaren 18tik 25era izanen da, Argentina, Brasil, Txile eta Uruguaiko 35 ikasle partaide. Aitzina eta goiti!