Sortze Herritar berri bat kondatzen dugu herrian: Kaïli LARROQUE. Aita du Ivan LARROQUE eta ama Lorelei BUTET. Zorionak gurasoeri eta ongi etorri Kaïli-ri gure artera! Herriko Etxetik 4 abisu 1/ Ekainaren 2az geroztik Herriko Etxea idekia da astelehenetik ostiralera (10:00-12:00) hitzordurik gabe ohiko eskaerarentzat. Aldiz hitzordu bat hartu behar da galdera berezi guzientzat: Hirigintza, Egoera zibil, Hauteskundeak, Eskola zerbitzuak edo beste... Telefonoa eta mezu elektronikoak abantailatu behar dira. Oroitarazia da maska beharrezkoa dela Herriko Etxean sartzeko. 2/ Bigarren maska bat eskuratzen ahal da kitorik Herriko Etxean. Hortarako Herriko Etxera presentatu behar da goiz edo arratsaldez, baina bazterreko leihotik, barnerat sartu gabe. Badira lehena ere oraino hartu ez dutenak. Herrian boza emaiten dutenek behar dute presentatu beren nortasun ageriarekin eta familia-libretarekin. Herrian bozkatzen ez dutenek behar dute gainera bizitoki frogagiri bat agertu. Jende sobera ez ibiltzeko, presuna batek etxekoentzat ere hartzen ahalko ditu maskak. 3/ Ondarkintegia zabalik dago konfinamendu aitzineko baldintzetan, hitzordurik hartu gabe. Halere ez da jende sobera ibili behar aldi berean. Zaindari batek kudeatuko ditu sartze eta ateratzeak. Eta maska soinean behar da presentatu. 4/ Oroitarazia da debekatua dela aparkatzea Gerastoko bidean, Atekagaitzeko eta Gibelarteko errebideetan. Elizako eta Atekako aparkalekuetan galdegina da jendeeri beren autoak uztea eta hortik mendirat abiatzea oinez.