Xingar feria

Apirilaren 4an ostegun huntan hasi da, xingar lehiaketarekin, igande arte iraunen duena. Xingarrak hiru kriterioren arabera epaitzen dira: mozketa, xukatzeko denbora eta usaina. Bestalde ferian, Roland-Barthes zelaigunean 18 xingar ekoizleren eta 20 bat etxaldetako edota artisautzako produktuak atzemanen dira: gasnak, ahate kontserbak, eztia, euskal tarta, ardi-esne izozkiak... momentuan gozatzeko edo etxera eramaiteko (9:30-20:00).

Herriko Etxearen aplikazio berria

"Bayonne ma ville" deitu aplikazioa Herriko Etxeak plantan jarri du, eskuko telefonoetan kargatzen dena. 20.000 euro kosta da. Informazio desberdinak jakiteaz gain, espazio publikoan gertakari edota andeatzeak baldin badira zuzenean seinalatzen ahalko dira. Horri esker, gertakaria laster lokalizatua da, zerbitzu teknikoek arazoa laster konpontzea ahalbidetzen du. Aplikazioa mementoan frantsesez da, laster euskaraz izanen dela errana izan da.

Baionan Kantuz-en 27. urtebetetzea

Baionan Kantuz-en urtebetetze kari, Baionako ikastolek, Lauga gelan, apirilaren 27an zikiroa antolatzen dute (13:00). Izenak apirilaren 18a aitzin eman behar dira, Baiona-Kantuz.eus gunetik.