Herriz Herri - Itsasu (L) | 2017ko Maiatzaren 25a
Gerezi Kofradiaren Besta
Asteburu huntan iraganen da Gerezi Kofradiaren urteko besta handia.
Asteburu huntan iraganen da Gerezi Kofradiaren urteko besta handia. 11. edizioa izanen da aurtengoa. Ospakizunak hasiko dira ostiral arratsean, maiatzaren 26an beraz: David Olaizola herriko semeak kontzertu bat eskainiko du Kanboko elizan bere Lagunekin (Les Compagnons) 20.30etan. Sartzea 15 euro. Larunbatean izanen da euskal biskotxa edo pastiza lehiaketa, Itsasuko gereziarekin egina: goizeko 11 orenetan parte hartu nahi dutenek behar dituzte beren biskotxak ekarri Sanoki gelarat, eta 19:00etan agertua izanen da emaitza. 15:00etan eginen da Kanboko Xokolategiko Museoaren bisita. Eta 20:00etan izanen da afaria, Ahopean taldeak animaturik. Izenak aitzinerat eman behar dira (tel: 05 59 29 74 85). Afari saria 22 euro. Igandean, maiatzaren 28an, goizeko 8:30etan ongi etorria egina izanen zaiote Kofradieri eliza inguruan. 11 orenetan meza, eta ondotik, tokian berean, Tronuratze ospakizuna. Ondotik aperitifa, eta Kofradien bazkaria 13:30etan Alzuetan, Ahopean taldeak animaturik.
