Emmanuel Macron president berria plantatu da beraz Pariseko Eliseo jauregi famatuan. Etxetiar bezala, ardietsi duen kargua atxikiko dueno hor egoiten ahal.

Emmanuel Macron president berria plantatu da beraz Pariseko Eliseo jauregi famatuan. Etxetiar bezala, ardietsi duen kargua atxikiko dueno hor egoiten ahal. Etxe hori biziki ederra da eta gisa hartako tokian kokatzen da, Champs-Elysées etorbide paregabearen bazterrean, hektara bat eta erdi baino gehixago hartzen duen parke baten erdian... 1879-ko lege bat berme, Eliseo jauregi hori da Errepublikako presidentaren egoitza. Aspaldiko etxea da, 1718-an hasi ziren eraikitze lanak eta lau urte iraun zuten. Denbora hartan, nehork ez zuen erraiten hain toki arraroa zela jauregi berri baten xutik ezartzeko hola hautatu zutena. Bazen pentze eta baratze zonbait, errepira frango ere ba. Parise ez baitzen oraino hanbat zabaldua, hiribarnetik kanpo bezala ekarria zen eremu hori, Louis-Henri De La Tour d'Auvergne aberats puxantak erosi zuena bestalde zituen ontasun batzu saldurik, arrunt bere gustukoa kausitua zuen leku hortan plantatzeko. Handik hogoita hamar bat urteren buruan hil zen eta erregea zen jabetu Eliseo egoitzaz, han bizi zadien biziki maite omen zuen andere bat. Zer den bestenaz aski bihotz onaren ukaitea eta aski moltsa handia ere ba... Geroztik izan da jabe asko, gora-behera frangoren ondorioz. Napoleon ere han egon zen zonbait urtez. 1848-an, bigarren Errepublikako lehen (eta azken) presidenta, aipatu dugun Napoleon ho rren iloba, Eliseo jauregian plantatu zen, egoitza egokiagorik ez zitakeela. Eta president hori inperadore jarri zenean, Napoleon III izena harturik, han berean segitu zuen. Jin zen gero hirugarren errepublika eta Mac Mahon marexala hautetsi zutenean, Eliseo jauregian egoitea erabaki zuen. Hori 1874-an. Handik sei urteren buruan lege batek zuen argi eta garbi À¯'¬'nkatu Eliseo hori izanen zela presidentaren egoitza... Geroztik beti hala da sei urtez zerratua egonik haatik, 1940-tik 1946-rat, gerlarengatik...

365 gela

Alimalea da Eliseo jauregi hori, 7800 metro karratuko eremua hartzen duela... Kanpoz ala barnez, zinez miresgarria! Orotarat, 365 gela badauzka, urteak egun bezenbat! Horietarik ehun bat lurpez, gaitzeko obrak eginak izanik. Lurpez diren barne horietan biziki jende guti sartzen ahal da, segeretu handiz begiratuak dira, zerbait handi gertatzen balitz hortik kudeatzeko Frantzia. Orotarat, 800 lagun badira alde bat Eliseo jauregian ari lanean. Bestalde, kasik alde bat obran ari dira jauregi hortan, eskualde batean ez bada beste batean! President bakoitxak bere gusturako arramoldaketa batzu ere egin-araziak ditu. Erran gabe doa etxea bera guziz ederra balin bada, barneak ere araberan apainduak direla. Argi eta gaineratiko badira gauza miresgarriak, altzari eta apaindura guziak araberan! Eta bizkitartean, hau ere gauza ezin ukatua ditake, bitxikeria ere kausitzen ahal dena, presidentak ez dira hor hanbat laketzen! De Gaulle jeneralak artetan erakusterat bederen emaiten zuen etxe hori ez zuela hain maite. Ikerketa batzu akularazi zituen funtsean beste egoitza bat nun izaiten ahalko zen. Bainan denen buru deusik ez zen egin. Ondotik jin diren president gehienak hor egon dira bainan beren bizitegi bat bestalde atxikiz beste nunbait, beti Parisen berean haatik... Chirac jaun-andereak ziren kasik alde bat hor egoki. François Hollande ere ba. Nicolas Sarkozy artetan bakarrik... Emmanuel Macron ardura hor egoitekoa omen da, hala emana du erakusterat... Gisa guziz, bera ez beti hor izanik ere, Eliseo jauregia presidentaren etxea da, legez-lege hala ekarria da alabainan eta lege hori ez bide da aise kanbiatuko... Urtean aldi bat, Ondarearen egunak direlarik, jauregiko zonbait gela nornahik bisitatzen ahal ditu... Bai, urtean aldi bat bakarrik...