Joan den astean hemen berean aipatua dugu Hendaiako "Arrantzaleen Etxola" deitu eraikina, portuan kokatzen dena, aski toki politean, luzaz jatetxe izana, bulta huntan zerratua.

Hendaiako portuan

Joan den astean hemen berean aipatua dugu Hendaiako "Arrantzaleen Etxola" deitu eraikina, portuan kokatzen dena, aski toki politean, luzaz jatetxe izana, bulta huntan zerratua. Barreatu behar den ala begiratu eta berritu, hortaz bazirela eztabadak, gai hortaz ari izan dira ere herriko kontseiluan. Solasgai zutelarik han berean den Tribord saltegiaren handitzea. Hautetsi guziak ados handitze horren onartzeko bainan ez inguruan egitekoa litakeen arramoldaketarentzat. Obra horien ondorioz lurrerat botatzen ahal-eta delako etxola... Batzuen arrangura, Herriko Etxeak ez duela aski argitasun eman hautu bat lañoki egiteko gisan. Badira ere bestalde zurrumurru desberdinak. Aditzen da alde batetik nehork ez duela, etxola berritzen bada, jatetxe baten berriz hor muntatzeko gutiziarik. Eta bestetik aldiz galdegileak balitazkeela ez bat edo bi bainan bederatzi! Azkenean, gauzak nola itzulikatuko ote dira? Horiek hola, bilkura berean kontseiluak erabaki du etxe-zergaren berriz emendatzea bigarren etxetako baliatuak diren bizitegientzat. Gisa hortako bizitegiak badira Hendaian 4428! Emendatze hori gostako zaiote bana beste 88 euro...

Obra handiak Harriet-Baita egoitzaren inguruan

Donibane Lohizunen, zinez toki arraroan kokatzen da Harriet-Baita egoitza, polizategitik zonbait urratsetan. Luzaz herriko ikastola hor aterbetua izana. Etxea hutsik dago orai bainan gaitzeko proiektua bada bizi berri baten emaiteko ez bakarrik etxeari bainan ere inguruko eremu guziari. Harriet-Baita bera zaharberrituz eta eraikin berri batzu eginez ondoan. Balitake areto zabal bat, 500 lagun sartzen ahal, ikusgarri askoren eskaintzeko, beste bat kultur maileko elkarteak sorkuntza lanetan artzeko, bestalde oraino musika ikastegi baten aterbea. Badela segur horien denen beharra. Obra horiek ederki gostako ere dira haatik. 8 miliun euro segurik lehen estimu baten arabera. Herriko Etxeak esperantza du araberako diru laguntzak ardietsiko direla departamenduarenganik, Akitania lurraldetik eta ere gobernutik. Gehiengoan diren hautetsiak arrunt alde, salbu batto, hein bat uzkur, iduritzen baitzaio muntadura horien mantenua eta kudeantza direla gero sobera gostako. Gehiengoan ez diren hautetsiak ez baitezpada proiektuaren kontra bainan gogoetatuak, behar-orduak aski funtsez aztertu ote diren, eta obrak ez ote diren azkenean gostako orai erraiten duten baino aise gehiago... Segur afera horrek ukanen duela oraino ainitz aipaldi...

Kortsarioak beti erne!

Donibane Lohizunen, Kortsario delakoen kofradi edo anaidiak bere biltzar nagusia zuen, eta bere besta, joan den igandean. Hogoita-zonbait anaidi bildu dira, batzu arras urrunetik etorriak. Beren arteko lokarriak azkartu dituzte, lehenik mezan, gero beren arteko bilkuran eta bazkarian. Meza denboran hain xuxen, fededunen otoitza guziz hunkigarria izan da, elkartasun kartsu bat hazten zuten solas batzuekin, denek gogoan besteak beste berrikitan Ameriketan izan diren makurrak, alde batetik ikaragarriko orronak izan direlalotz eta bestetik, Mexikon, bi lurikara biziki bortitzak. Kofradiek gomitaturik, Begiraleak elkarteko dantzari ttipiek Ezpata-Dantza biziki poliki eman dute Sakramendu Sainduaren ohoretan, kanpotiar batzu aski harrituak ere baitzauden... Kantuentzat, han zen partaide Errobi Kanta abesbatza, bere talendu nasaia ederki agertu duena.