Sartuak gira urteko lehenengo astean eta Diasporan ere gibelean utzi ditugu Eguberri eta Urte Zaharreko besta eta ospakizunak, abantzu guziak bederen.

URTE BERRIA

Sartuak gira urteko lehenengo astean eta Diasporan ere gibelean utzi ditugu Eguberri eta Urte Zaharreko besta eta ospakizunak, abantzu guziak bederen. Euskal Etxe frangotan eginak dituzte Eguberri bestak eta urtea agurtzekoak. Hego Amerika osoan, konparazio, urteari azken agurra emateko bestak egin egiten dira, baina aitzinaturik, abendoan zehar barreiatuta; gisa bera Ipar Amerikan eta Europa eta Asiako euskal etxeetan ere. Kalifornian, usaian meza eta haurren antzezpena egin ohi dira, Santa Clausen bisita errezibiturik. New Yorkeko EEan, Olentzeroren bisita jasotzen dute. Mexikon, 'posadak' deitu elgarretaratzeak egiten dituzte, eta hiriburuko Euskal Etxean Errege Magoen besta eta bisita ospatzeko ohidura dute, eta hala eginen dute heldu den asteburuan. San Frantziskon, Elkon eta Salt Lake Cityn, Urte Zahar besta bere tenorean egin berria dute joan den igandean, urte berria euskaldunen artean errezibiturik. Eta aipu honen bururatzeko, erran dezagun beste euskal etxeren batean, Olentzero berantiarra ukanen dutela, Akitania Berriko hiriburuko Euskal Etxean konparazio, ikazkin potoloak urtarrilaren 14an eginen baitie bisita Bordeleko haur euskalduneri.

MARIE ELU HIL DA

Abendoaren 22an hil da San Frantziskon, 94 urte zituela, Marie Elu. Bere izena biziki lotua da San Frantziskoko euskal ostatueri eta oro har euskal komunitatearen historiari. Senar Louis bezala Ameriketan sortua, Marie Rose Elu ostaliersa edo ostatu-nagusia izan zen hiriko Broadway auzoa euskaldunen erreferentzia zelarik. Andana bat euskaldun errezibitu zituen etxean bezala eta famili-giroa eta laguntza eman zien. Sukaldari on fama zuen. Hogei urtetarik goiti Elu's Basque Restaurant San Frantzisko aldeko euskaldunen biltoki izan zen. Elizkizunak bere oroimenez ostegun huntan, urtarrilaren 4an eginen dira goizeko 11etan St Gabriel elizan. Ondotik ehortziko dute Holy Cross hilerrian. Doluminak seme-alaberi, familiari eta ezagutu zuten guztieri. Goian Bego.

ELKOKO 'OGI DELI'

Urtea bururatzeko, artikulu bat argitaratu zuen joan den astean Elko Free Daily Press egunkariak, hiriko 2017ko hamar 'top' negozioak sailkaturik. Eta hor aipatu zuen Anamarie (Sarratea) Lopateguiren eta Mikel Lopateguiren 'Ogi Deli' kantina eta kafetegia. Ogi berezia egiten dute (hortarik lekuaren izena, Ogi) eta sandwich eta ogitartekoak saltzen dituzte, baita ere euskal moldeko janari batzuk eta, edarien artean, konparazio, Euskal Herriko sagardoa, patxarana eta kalimotxoa, besteak beste. Nevadan buraso euskaldunen seme-alaba dira Anamarie eta Mikel, atxikiak eta euskal musikariak, Anamariek akordeona eta Mikelek panderoa jotzen baitute, euskal bestetan eta Lamoilleko Ardi Baltza dantza taldearendako. Zorionak bikote gazteari!