Orotarik | 2022ko Uztailaren 28a
Bake Bidea eta Bake Artisauen blokatze eguna
Larunbat arratsaldean bururatu dira bide blokatzeak, Baionako suprefeturan egin den elkarretaratzearekin. 2.000 pertsona inguruk parte hartu du, 15 gune blokatu dira.
Prefeturak ekimena debekatu bazuen ere, eguna kalterik gabe iragan da, sokorri zerbitzuek zirkulatzeko plantan emana zen protokoloa errespetatuz.
Egun guzian zehar polizia anitz izan da, Guardia Zibil eta Polizia Nazional espainola ere, bide sare nagusian ikusi ahal izan dira.
26 pertsona arrastatuak izan dira. Horietarik batzuk Biarritzeko aireportuko pistan eta besteak trenbidea blokatzen zutela.
Euskal presoen egoera politiko eta juridikoak pairatzen duen blokeoaren aitzinean, Bake Artisauek bortizkeriarik gabeko ekintza eraman dute. Preso horien artean dira Jakes Esnal eta Ion Parot, bizi guzirako zigorrera kondenatuak, 32 urte baino gehiago preso direla. "Blokeo judizial eta politikoari, blokeo geografikoarekin erantzuten dugu", hori zen Bake Artisauen helburua.
Egunaren bururatzean, ehunka bake artisau elkartu dira suprefetura aitzinean, arrastatuak izan zireneri sustengua ekartzeko. Anaiz Funosas, Bake Bideko bozeramaileak adierazi du, prefeturaren debekuaren gainetik, halere blokatze eguna gauzatu zela, inongo trabarik gabe.
Blokeatzetan eta elkarretaratzean hainbat hautetsik parte hartu dute, tendentzia politiko guzietakoak. Prefetarekin delegazio bat bildu da. Hautetsiek bake prozesuaren blokeo egoeraren aitzinean zuten kezka adierazi nahi ukan dute, terrorismoaren kontrako prokuradoreak duen jarreragatik, baldintzapeko askatasun eskaera guziak gibelera botatzen baititu. Larunbateko mobilizazioaren deia Parisen entzuna izanen dela espero dutela gehitu dute.
