Europako hauteskundeak

Badakizue Europar deputatuen hautatzeko bozak ekainaren 9an iragaitekoak direla, igandez. Bada hautu: 38 lista aurkezten dira. Kasu! Bozkatu nahi duten baigorriarrek jakin dezatela ez dela aldi huntan bozka bulegoa Plaza Xokon izanen, bainan Herriko Etxean berean.

Gure mintzairaren alde

“Konstituzio aldaketa, euskarari trabarik ez, azterketak euskaraz, baliabideak euskararentzat”. Beste hainbat tokitan bezala, elgarretaratzea egin da Baigorriko merkatuan, joan den ibiakotzean, gure hizkuntzak ofizialtasuna eta zor zazkon eskubideak eskura ditzan galdatzeko.

Neskattoak lehiaketa

Lizentziadunen herena neskak izanki, hauen pilota saila aspaldidanik garatzen du Zaharrer Segi batasunak. Egungo egunean, palaz gain, beste joko motak ere badituzte: esku-huska, frontball, frontenis.

Ekainaren 8an, ibiakoitza, “Neskattoak” lehiaketa antolatzen dute, Baigorri herriko plazetan, Euskal Herriko Ligaren partaidetzarekin. Iparraldeko nesken pilota eskolen eguna izanen da. Nafarroako batasunak ere gomit dira eta orotara 200 bat jokolari bilduko dira. Horra egitaraua: (9:00) neska pilota eskolen biltzea, (12:00) bazkaria, (16:00) finala eta (17:00) sari banaketa.

Azken egun hauetan, pilotaz aspaldian arduratzen diren 3 emazte handizki ohoratuak dira, trinketaren paretaren gainean emanak diren argazkiekin: Monique Berterretche, Monique Bascans eta Maritxu Semerena.