Eskubaloia

Gizonetan, nazional 2 mailan, Irisarrik Atharratzeri irabazi du, 22-21. Airoski gelarat gaitzeko jendea bildu da, partida biziki tinkia izan da, hastetik bururaino. Hendaiak galdu baitu, Irisarri eta Atharratzek maila berean segituko dute, Hendaia jautsiko da.

Prenazional mailan, bigarren taldeak irabazi dio Saint Medard-i, 27-22. Horiek ere, maila berean ariko dira. Departamenduko xapelgoaren finalerdian bost talde gazte baziren, gibeleratuko partidak ziren, hiru talde finalera heltzen dira.

Mutikoetan, Irisarri/Atharratzeko hemezortzi urtez petiko bigarren taldeak Gan/Lasseube taldeari irabazi dio, 35-25. Orain finalean dira. Hirugarren taldeak Hendaian irabazi du, 34-33. Finalerat joaiteko bi ttanttoz behar zuten irabazi, domaia!

Nesketan, Irisarri/Kanboko hemezortzi urtez petikoek, Ossauren kontra irabazi dute, 39-18, finalean dira.

Hamabortz urtez petikoek Atharratzeren kontra irabazi dute, 28-26. Horiek ere finalean dira. Bigarren taldeak Hendaian galdu du, 20-16.

Departamenduko finalak jokatuko dira, Billère eta Gan-en, ekainaren 14, 15 eta 16an.

Baxe Nafarroako etxeak beste begirada batez

Ospitaleko Ondare Zentroak Dominique Duplantier artistaren urratseri jarraitzea erabaki du, bere arkatzezko trazu trebeen bidez. 2000ko hamarkadan Baxe Nafarroan etxe anitz diseinatu zituen, berezitasun horiek erakutsi ditu. “Baxe Nafarroako etxeak beste begirada batez” deitu erakusketa ikusgai da ekainaren 15a arte.

B.L.

Pilota

Plaza laxoko xapelgoan bigarren mailako bi parek kanporaketak jokatu dituzte. Lehenik, Iholdiko plazan, Irisartarrak 2 Etchegaray-Arbeletche 30 / Airetik 1 Jauregiberry-Hiriart 25. Hau ginuen lehen eta bigarren mailakoen arteko kanporaketa, ondorioz Irisartarrak 2-k segitzen du lehen mailan final-zortzirenak jokatuz. Aldiz ez dakigu aldi huntan Julien Arbeletchek norekin arituko den, jakinez hastetik David Etcheto kolpatua dugula.

Irisartarrak 3 Mollon-Chamalbide 30 / Oztibartarrak 20. Emaitza horrekin Jon eta David-ek 2. mailako final 16.a jokatuko dute. Beti final 16.ean ditugu ere Irisartarrak 1 Etchegaray-Bidart bigarren mailan eta Irisartarrak 4 Poutçou Hourcade anaiak hirugarren mailan. Beraz aste hondar huntan ere izanen da nun joka eta zer josta.

Bestalde Irisartarrak pilota elkarteak bere usaiako udako lehiaketak antolatzen ditu. Trinketekoa abiatua baldin bada, plaza laxokoarentzat izenak eman behar dira ekainaren 9a aitzin, Fabrice Mollon deituz: 06-74-58-45-51.

MO.