ELB sindikatuak, Lurzaindiak eta OSTIAk joan den igandean mobilizazio deialdia zabaldua zuten, goizean goizik Marieneko pentzera jende andana hurbildu da. Egun batzuk lehenago, 53 ardi eta asto bat, laborariek emanak, Marieneko funtsetan sartuak izan ziren. Igande goizean ofizialeak etorriak ziren arditegiaren muntatzeko behar ziren tresna guziekin, goizarekin lana aitzinatua bazen, arratsaldean hor ziren guziekin lana burutu da. Bidetik eraikin ederra ikusgai da, behar-orduan desmuntatzen ahal dena.

Goizarekin, lurraren defentsako kolektiboen topaketak iragan dira, Marieneko aferaz gain, Euskal Herrian eta haratago diren beste borroka batzuen berri eman da. Giro onean bazkari partekatua eta animazio desberdinak entzun ahal izan dira.

Ibilbide luzeko borroka

Badu 10 urte 3 hektarea eraikigarri dituen Marieneko zelaiaren etxe proiektuaren kontrako mobilizazioak eramak direla. Orain arte, besteak beste, obren abiatzeko oztopatuak izan dira: errekurtso juridiko, petizio, manifestazio eta lurraren okupazioa. Hala ere, igandeko mobilizazioan gelditzen diren helburuak proiektua gelditzea eta lurrak behin betiko laborantza sailkapenera eta erabilerara itzultzea direla aldarrikatu da.

Borroka beti baketsua izan dela antolatzaileek azaldu badute ere, oroitarazia izan da 2025ean landatze kolektiboak masakratuak izan zirela pertsona anonimoen partetik, baita joan den martxoan ereina izan zen ogiaren gainean produktu kimikoak ere isuriak izan ziren.

Herriaren posizio berria

Azken herriko eta Euskal Elkargoko hauteskundeen harira, Kanboko herritarrak Marieneko proiektuaren kontra argiki posizionatu dira. Igandean hitzaldietan baikor agertu dira, bidea luzea baldin bada ere esperantza bada Marieneko lurrak laborantzarentzat atxikiak izanen direla. ELB sindikatuak, Lurzaindiak eta Ostiak positiboki ikusten dute hautetsiekin dituzten trukaketak, proiektua bertan behera uzteko xedearekin. Arazoa Bouygue Immobilier baino haratago doa. Marieneko lurrak eraikigarriak direnez, beste promotore batzuk proiektuaz jabetzen ahalko lirateke, etorkizuneko PLUi-ak Kanboko egungo PLU-a kontra-erran arte.

Marieneko funtsen betonatzeko borroka juridikoa oraindik bukatua ez bada ere, defendatzaileek urbanizazioa behin betiko gelditzeko aterabide politikoa dela diote. Sinesten dute jendartearen presioa segitzea ezinbestekoa dela, igandean erakutsia izan den bezala.