Senpereko Jaunak aipagai

Asteazkenean, ekainaren 24an, Inharria baserrian iraganen da egun berezia ikerketa unibertsario baten moduan izendatu daitekeena “Senpereko Jaunak, 100 urteko Gerrako munduan”. Paueko eta Aturri eskualdeko Unibertsitatea baita Senpereko Kultur eta Ondare elkarteak, Herriko Etxearen partaidetzarekin ekimen interesgarria antolatzen dute, sartze librean. Gure herriaren garai bateko historia aztertua baita, herritarren presentzia handia merezi luke, dudarik gabe. Parte hartuko dute hitzaldi eta trukaketetan historialari berezituak. Egitarauan, (10:30) Bonnet Ostatuan, parte hartzaileen harrera, (11:00) gazteluaren bisita, (12:30) bazkaria, (13:45) sar hitza Pierre Courroux-ekin, (14:00) Mathilde Berniolles-en hitzaldia “Amezketarrak, Senpereko Jaunak Erdi-Aro hondarrean”, (14:45) York Unibertsitateko Katy Bennett “Ingalaterrarako leialtasuna Hego-Gaskonian 100 urteko Gerran”, (15:45) Inigo Mugueta, Nafarroako Unibertsitatekoa “Nafartar Nobleziaren etxe-dorreak”, (16:30) Ekaitz Etxeberria Gallastegi, Pais Vasco unibertsitatekoa “Gerra pribatuak Euskal Herrian Erdi-Aro hondarrean”.

Xabier Elosegiren liburua

Mediatekan, ekainaren 25ean, ostegun arratsaldean (17:30), Lapurdi 1609 elkartearen ekimenez, Xabier Elosegi idazleak bere azken obra “Senperen eta Lapurdin, iraganean zehar” aurkeztuko du. Urteetan ikerketa sakona egin ondoren, bereziki notarioen artxiboetan, historiako gertakari asko eta datuen berri eskaintzen digu liburuan. XVII eta XX. menderainoko gizarteari lotuak diren argibide ugari atzeman ditzakegu, gaiak direlarik: jendea: zenbait biografia, istorio, jende kondaketa. Lekuak: Urdazuri, kadastra, lurraldea. Senpereko bizitza: herriaren kudeantza, erregetza, eliza, gaztelua eta bertze. Euskara Senperen, Lapurdiko autonomia, eskolak. Senpereko etxeak: etxeen izenak, etxeak auzoka. Senpertarrentzat zinezko altxorra. Euskarazko ekitaldiak sortuko duen solasaldia bururatuko da trago batekin.

Flamenco “Arraigo” ikusgarria larunbatean

Ekainaren 20an (20:30) Larreko sala animatuko da flamenco dantzen erritmo biziarekin, A Bailaaar elkarteko ikasleek eskainirik, Caroline David artistaren zuzenketapean. Prezioa 15€, 12 urtez petik 10€, erreserba: helloasso.com (a-bailaaar) gunean.

Gospel kontzertua elizan

Ekainaren 21ean, igande arratsaldean (17:00), Donibaneko Gospel City abesbatzak gomitatu du Baionako Gospel City taldea gure elizara, gaitzeko emanaldia eskaini nahian entzuleei. 100 bat abeslariren bozek musikarien laguntzarekin, bazterrak harrotu behar lituzkete, publikoaren atseginetan. Prezioa 10€, erreserba: helloasso.com (gospel-city).

Mutxikoak igande goizean

Hilabetero bezala Xan Ithourria plaza beteko da mutxiko dantzariez (11:00 eta 12:30 artean), musikak behar duen erritmoa emanik, denak ongi gozatuko dira.

Suhiltzaileen elkarrizketa

Ekainaren 2an, Senpereko suhiltzaileen parkean, Lesaka, Bera eta Oronoz-eko suhiltzaileen ordezkariak bildu dira, partaidetza ofiziala izenpetzeko gisan, Donibane Lohizune eta Senperekoekin. Muga bi aldetako lankidetza baieztatua izan da, senidetze-hitzarmen berri baten bidez, hala nola jadanik martxan ezarria den Irun eta Hendaiaren artean, Garazi/Baigorrik ere Aurritze eta Luzaidekoekin. Beharrezkoa baitago elkarrekin lan egitea bereziki mugako eremuetan, iragarria da ere tarteka ariketa bateratuen antolatzea. Departamenduko zonbait agintarik baita Senpere, Sara, Ainhoa eta Zuraideko auzapezek parte hartu dute ekitaldian. Hitzaldi eta maniobren ondotik, 70 kide bildu dira mahain baten inguruan ongi gozatzeko.