Lehengo gazteen bazkaria

Aspalditik, urte guziz Herriko Etxeak 3. adinokoeri eskaintzen dien bazkarian 40 bat parte hartzaile izan dira joan den larunbatean.

Azken urtetan bezala “On egin” herriko jantegian bildu dira, kanpotik ekarri janari onen gozatzeko, araberako edari finekin.

Usaiako elgarretaratze goxoa izan da, batzuek musean bururatu dutena.

Herriko Etxetik

2025eko herri aldizkaria egun hauetan eskuratu dugu. Besteak beste, bereziki aipatuak dira herriko obrak eta egitasmoak.

2025ean herri barnea antolatzeko lehen lanak abiatu ziren elizaldean, urte erditsutan bururatu ziren autobus geltoki eta aparkalekuarekin. Uda huntan, Harpealde gunearen inguruko antolaketa obren aldi izanen da, ekain erditarik agorril hondar arte.

Harpealde gunearen zaharberritze energetikoaren sailean 2025ean trinketeko argiak berritu ondoan, hor ere uda huntan sail bereko lanek segituko dute (argi, haizeztatze sistema, isolamendu) eskola publikoko ikasgeletan eta erabilera anitzeko gela handian. Obra horiengatik, gunea hetsia izanen da uztailaren 6tik irailaren 1era eta Arberoan Alaiki aisialdi zentroa Aiherrako ikastetxe publikora aldatuko da.

Xehetasun gehiago emanen dugu heldu den astean.