Iparraldeko pilota batzordeko xapelgoaren konduko finaletan, bi egunez Irisartarrak Pilota elkarteko hiru parek finalak irabazi dituzte. Lehenik, Iholdiko plazan, ostiral iluntzean, bigarren mailako Bidart eta Etchegaray nagusitu dira 30-13 Zaharrer Segikoen parean. Paolo eta Julien hastetik kantxaren izkin guziak miatu eta kintzeak erdietsi dituzte.

Biharamun goizean, Zuraideko plazan, beste bi parek jokatu dituzte beren finalak. Gazteak B-ko Merle-Mentaberri eta Lascarayk irabazi diete 30-23 Denek Bat-ekoeri. Oier eta Aihelik denetarik erakutsi dute, halere beti aitzinean izanez. Goresmenak!

Azkenik, hirugarren mailako Mollon eta Bidart txapeldun atera dira, partida eramanez 30-14 Senperekoen parean. Jon eta Xanek hastetik beren nagusitasuna erakutsi dute, bai besoz eta bai jokoz. Irabazte horrekin, gure pilotariak bigarren mailarat hupatzen dira heldu den urtean.

Bestalde, hemendik goiti bi parek, bigarren mailako Bidart-Etchegaray eta lehen mailako Etchevers-Arbeletchek, frantses federakuntzako xapelgoan segitzen dute, laster final-laurdenak jokatuz. Pentsatzen dukezuen bezala, txapel horiek ongi ospatuak izan dira, hor ere Irisartarrak Pilota elkarteko kide eta sostengatzaileak txapeldun atera dira!