Otsanzko beila

Urte oroz bezala uztailaren 22an santa Madalena kari eginen da Otsanzko beila, Uztaritze, Zuraide eta Senpereren juntan den kaperan. Meza izanen da (18:00). Beilara oinez joan nahi dutenentzat hitzordua emana da Uztaritzeko eliza aitzinean (14:30). Bi orenen bidea oihanean barna, ez sobera zaila. Hartu halere oinetako onak eta edariak.

Herriko bestak

Herriko bestak hurbilduak ditugu eta aurtengoen egitaraua honela agertzen da:

Ortzegun 23a: (18:30) Hitzopen Gaztetxeak antolaturik pintxo potea, Xibalet elektrotxaranga animatzaile herri barneko lau ostatuetan. Ortzirale 24a: (16:00) Bilgunen adinekoen arratsaldekoa besta komiteak eskainirik; (18:00) Kiroleta trinketean pilota aitzin-partida palan neskekin, (19:00) esku-huskako partida lau burujabe hoberenekin; kontzertuak Bilgunen: (20:0) Josteta gizon korua, (21:30) Dizkobolo taldea, (23:00) Lanbro taldea, (0:00) La Txama taldea; gaua bukatzeko (1:00) dantzaldia DJ Doy. Larunbat 25a: (8:00) Xopolon laborantzako kabalen erakusketa (tokian berean izanen da goizeko askaria hartzeko manera), eta sarien banatzea; arratsaldean (13:30) Etxeparea zelaian 7 lagunetako zangobaloi lehiaketa (izenak eman 07-68-21-96-71ra), aldean petanka lehiaketa Errobiko Kaskarotak elkarteak antolatua (jateko eta edateko tokian berean segurtatuak); (16:30) Bilgune frontoian joko garbi partida Kapito Harriko gazteekin, (17:30) pala partida Kapito Harriko neskekin, (18:30) esku-huskako desafio partida pilotari helduekin; (21:00) afaria (23 eurotan) eta dantzaldia Kontrabanda taldeak animaturik. Igande 26a: (10:30) bestetako meza Bixintxo elizan, Labourdins elkarteko soinulariekin, (11:30) entzierro ttiki desfilea gaiteroekin, (12:00) Hiribehere plazan auzapezaren aperitifa mutxikoen emanaldiekin, (12:30) bertso saioa Elixabet Etxandi, Nerea Ibarzabal eta Unai Iturriaga bertsolariekin; ondotik bazkariak ostatuetan eta Gurekin elkartearekin. Arratsaldez (18:00) Izartxo dantza taldearen emanaldia, (19:00) Soinu Sare Kantuz, (20:00) Uztaritzeko Txaranga, (22:00) gaualdia Joselontxos animatzaile, (23:00) suzirien ikusgarria Errobi bazterrean tiraturik.

Ez da dudarik egitarau aberats hortan edonork aurkituko duela bere gostuko ausagailua eta bestetan parte hartzeko manera. Dena den iragan ditela umore onean, elgarren errespetuan, istripu eta erasorik gabe eta agian aro ona lagun. Besta on deneri.

Pilota

Joan den asteburuan jokatu dira Euskal Ligaren kondu erreboteko finalak helduetan. Kapito Harrik bere bi talde nagusiak lehian zituen. Larunbatean Donapaleun, beroarengatik, B taldekoak (Fernando, Bidart, Elissalde, Sallaberry, Migueltorrena) txapeldun atera dira Endaiarrak taldea garaituz 13/4. Partida zaila abiatua zen hastapenean, asko faltarekin eta alderdi kanbiaketekin, launa berdin izan arte. Gero haatik gure mutikoek gaina hartu dute emeki eta seguretik eta partida bururaino eraman. Igandean A taldearen aldi zen Donibane Lohizuneko plazan finalaren jokatzea, beti berdin beroarekin. Baigorriko talde nagusia zen arerio; partida zaila igurikatzen ginuen eta ez dira gure pilotariak heldu garaipenera; galdu dute 5/13. Frantziako xapelgoa hor izanen da laster beharrez errebantxari pentsatzeko.

Hitz hau irakurtzean, errebotean beti gazte mailakoen finala Uztaritzen iragana izanen da uztailaren 14an Baigorri Hazparneren kontra. Emaitza ondoko astean.