PPk eta Voxek pausatu helegiteen ondotik, EAEko Justizia Auzitegi Nagusiak Espainiako Auzitegi Konstituzionalari eskatu zion ebatz zezala ea Euskal Enplegu Publikoaren Legeak ezarria duen hizkuntza eskakizunen baitezpadakotasuna Espainiako Konstituzioaren araberakoa ote den. Joan den astean, Espainiako Auzitegi Konstituzionalak bere erabakiaren berri eman du: galdea ez du aztertuko. Beraz, EAEko Justizia Auzitegi Nagusiaren esku gelditu da behin betiko erabakia.

Horrek erran nahi du Espainiako Auzitegi Konstituzionalak ez duela ikusi Euskal Enplegu Publikoaren Legea Espainiako Konstituzioaren kontrakoa dela pentsatzeko arrazoirik. Hala ere, auziak zabalik segitzen du EAEko Justizia Auzitegi Nagusian, eta erakunde horrek eman beharko du behin betiko ebazpena.

Ibone Bengoetxea Eusko Jaurlaritzako Kultura eta Hizkuntza Politikako sailburuaren ustez, biziki berri ona da hau: “Ez da kolokan jartzen esfortzu handiarekin eta adostasun zabalarekin eraiki dugun eredu hau”....

Duela 50 urte, 1976ko irailean, Guardia Zibilak tiroz hil zuen Josu Zabala Erasun, 24 urteko irundar gaztea, Eduardo Moreno Bergaretxe Pertur desagertu zela salatzeko Hondarribian egin zen manifestaldi batean. Joan den astean, Espainiako Gobernuak biktima gisa aitortu du, Memoria Demokratikoaren Legeari jarraikiz. Onarpenaren berri ematen duen testuaren izenburua “Aitortza eta erreparazio pertsonalerako adierazpena” da eta erraten du Zabalak “arrazoi politiko eta ideologikoengatik jazarpena” jasan zuela, eta “aitortzarako eta erreparaziorako eskubidea” duela biktima gisa.

EH Bildu, EAEko Ahal Dugu, Ezker Anitza, Berdeak Equo eta Sumar mugimenduak elkarrekin mobilizatuko dira uztailaren 18an Gasteizen “Atzoko eta gaurko faxismoaren aurka, errepublikak eraiki” lelopean, 1936an Espainiako II.Errepublikan gobernatzen zuen Fronte Popularra gogora ekartzeko eta Francoren estatu kolpea salatzeko. Ekimen hau antolatu duten alderdien ustez, “fronte antifaxista” plantan ezartzeko garaia da. Faxismoaren kontra, Espainian bezala Europan ere, herri klaseak kontutan hartuko dituen “alternatiba demokratiko eta ilusionagarria” osatu behar litzateke. Horren beharra argi uzteko hautatu dute altxamendu frankistaren 90. urteburua. Elkarretaratzea eginen dute Gasteizko Katedral Berriaren aitzinean (12:00).

Estatu kolpeaz gain, 40 urteko diktadura, jazarpena eta askatasunik eta justiziarik eza gaitzetsiko dituzte. Halaber, “ahanzturaren eta bidegabekeriaren kontrako ekitaldia” izanen da larunbat honetakoa,...

Bertze 90. urteburu bat ere betetzen da aurten: Donostiak frankisten altxamendu militar faxista garaitu zuenekoa. EH Bilduk urtean zehar ekimen desberdinak burutzen ari ditu gertakari hura omentzeko, eta horien artean izanen da uztailaren 28an (12:00), Loiolako Urdintzuko zubian antolatuko duten ekitaldia.

Jon Markel Ormazabal eta Garbiñe Alkiza hautetsiek honela azaldu dute gertakari haren omentzeko arrazoia: “Gertaera hau mugarria izan zen, eta demokrazia eta legaltasun errepublikanoaren alde borrokatu zuten askotariko edo ideologia desberdinetako donostiarrak balioan jarri eta oroitu nahi ditugu”.

Aurten 29 urte betetzen dira ETAk Miguel Angel Blanco bahitu eta hil zuela. Gertakari hark sekulako inarrosaldia sortu zuen euskal jendartean. Uztailaren 10ean, omenaldia egin diote bere sorterrian, eta mezu bat zabaldu dute horrelako egitateak ez daitezen ahanzturan geldi.

Bestalde, Netflix plataformak “Miguel Angel Blanco: las 48 horas que lo cambiaron todo” (dena aldatu zuten 48 orenak) dokumentala estreinatu du Ermuako zinegotzi gaztea bahitu zuten egunaren 29. urteburuan. Jon Sistiaga eta Juanjo Lopez dira dokumentalaren egileak. Funtsezko lekukotasunak ikusgai dira obra horretan: ETAren inguruko jende batzuenak, garai hartan Espainiako Gobernuan ziren kargudun zenbaitenak eta hainbat kazetarirenak, bertzeak bertze. Elkarrizketez gain, artxiboko irudietan ageri dira egun haietan herritarrek ETAren kontra egin zituzten elkarretaratze eta manifestaldiak.