Aldi huntan Suhuskunerat bildu dira maiatzaren 8 huntan, beren espos lagunekin, Bidarrai, Arrosa, Ortzaize, Irisarri eta Suhuskuneko soldado ohiak, bertze ainitz lekutan bezala, egunari joanki den oroitzapenetan. Eguerdi aitzin, oroit-harriaren aitzinean egin da zeremonia, minixterioko mezua René Etchemendy auzapezak irakurturik, bost herrietako azken hiru gerletan beren bizia eman dutenen izenak plazaratuz, azaua pausatzea auzapezak eta Bouquet kolonel arrosatarrak, eta ere memento hunkigarria, eskolako hamar bat haur gazte horrat jinak, beren lore pollitak ezarriz, musikariek, Jean Bernard Noblia buru, beztitu dute agurtze hori. Hortarik landa, meza eder batean parte hartuz, Gracia erretorak azpimarratu du bakearen hedatzea denetan. Segidan, hilerrirat juntatu dira denak, Arño Laby herritarraren hobia ren ingururat, zoina 1958an, maiatzaren 24an, Aljerian erori baitzen guduka batean, 22 urtetan. Omenaldi berezi bat egina izan zaio, haren bizi laburra plazaratuz bere haurride eta familiakoez inguraturik. Peio Soulek kantatu du euskaraz moldatua zuen kantu guziz ederra, gerlan hil direner egina: “C'était mon copain, c'était mon ami”. Apezaren benedizioneak bukatu du zor dugun eginbide hori: ‘oroit eta ez sekulan ahantz’ daukute errepikatzen aldi oroz Itsasun den oroit-harriaren aitzinean biltzen girelarik. Egunaren bururatzeko, zintzur bustitze goxo bat hartu eta, denek, orotarat 60 bat lagun, Bidarraitar eta Irisartar multxo ederra, bai eta ere bertze 3 herrietakoak, apairu on eta nasaia Boitin sukaldari herritarrak prestaturik partikatu dute omore hoberenean. Segi ditela agian luzaz gisa hortako elgarretaratzeak.