Donoztiriko herriak Daniel LANDART herriko semea ohoratuko du martxoaren 3an igandearekin, arratsaldeko 3ak et'erditan, Beti Xutik gelan. ILDOKA antzerki taldeak "Jendeak" liburuaren zatiak irakurriko eta antzeztuko ditu. Ondotik, Txomin HEGUYk kudeatuko du Daniel-i eginen zakon omenaldi xume bat (agian merezi duen bere obraren araberako bat beste nunbait egina izanen zaio) zoinetan bere lagun batzuen lekukotasunak entzuten ahalko diren, Andde DUHALDE eta Mixel DUCAUk Daniel-eri idatzi kantu batzuk xaramelatuko dituztelarik artetik. Herriko Etxeak eskertzen ditu ekintza horren bultzatzaile izan diren Ildoka antzerki taldekoak bai eta omenaldian parte hartuko duten artistak. Memento goxo bat pasatzeaz gain, Daniel LANDART-en obra gogoratzeko parada paregabea ukanen dugu: hamabi antzerki, bost liburu, hainbat olerki eta kantu famatu idatzi ditu. Arratsaldea goxoki bururatuko dugu trago baten inguruan. Gela ehun lekutarat mugatua izanki eta herritarrer lehentasuna emaiteko, tokiak aitzinetik atxikitzea aholkatzen dauzugu lehenbailehen 06-84-87-80-39 zenbakirat deituz (mezua utzi).