Antzerki berezia Arberatzen joan den astean Joan den asteazkenean, irailaren 9an, "Les chiennes nationales" konpainiak bere sorkuntza hogeita hamar bat herritarren aitzinean presentatu du Arberatzeko herriko gelan. Aste bat lehenago, lau artista etorriak ziren obra horren preparatzera Euskal Elkargoarendako lan egiten duen Hameka fabrikak galdeginik. Jack Londonen liburua "Ce que la vie signifie pour nous" oinarritzat hartuz, Clémence Barbier eta Maia Ricaudek antzerki bat inprobisatu dute publikoa partaide bezala hartuz. Ipuin horren haria gizarteak sortzen dituen desberdintasunen inguruan obratua zen. Umore anitzekin mezu eder batzuk pasarazi dituzte elkartasun eta engaiamenduari buruz. Bukatzean, publikoa gomitatua zen gizartea bere desberdintasunekin sinbolizatzen zuen eraikuntza handi bat desegitera, erakusteko mundua aldatzen ahal dugula nahi badugu. Zinez memento interesantea. Domaia ez baitzen behatzaile gehiago! Hor zirenek plazer hartu dute eta, baso bat eskuan, solastatzeko aukera ukan dute konpainiako jokolariekin. Orotarik - Herriko bozak hurbiltzen ari zauzkigu! "Donapaleu berria" elkarteak bere biltzar nagusia eginen du urriaren 18an ostiralez (20:00) Lagunt etxeko egoitzan. Pentsatzen ahal da herriko bozak aipatuak izanen direla. Gomita, nahi duenari zabaldua da. - Joan den ostiralean Xilaba bertsu lehiaketa jokatzen zen Amenduzeko eiheran, Amikuzeko "Eskukulak" eta Sarako "4 kopla" taldeekin. Xehetasunak emanen ditugu heldu den astean. - Ibiakoitzean urriaren 19an, Michel Iturria eta André Minvielle, Bideak egoitzan izanen dira. Michel Iturria marrazkilariak (14:00), bere liburuen izenpetzea segurtatuko du eta (15:30) bere marrazkien inguruan elestaldi bat antolatua izanen da. André Minvielle da trobadore kantaria hor izanen arratsean. "Le Bovélo de Babel" emanen du (20:30). Sartzea 15€tan. Lekuak aitzinetik atxikitzen ahal dira. - Bular emaitearen eguna nazioarteko egunen kari, informazio trukaketa bat antolatua da urriaren 17an Donapaleuko ospitalean (14:30-16:30). - Baxe Nafarroako erakustokia idekia izanen da urrian ostiralez (14:00-17:00).