Zer berri: uda utzi dugu eta larrazkenean sartu gira. Aurtengo uda oro har ona izan da. Laborantza munduan bildu da zuhaitz- fruitu eta barazki, denek ez dute xantza berdina ukan. Anitz idorte izan baita kanpoko eskualdetan. Egun bat edo bertze bero handiak ukan ditugu neurriz kanpokoak. Aro ikertzaileen arabera, holako beroak gero eta gehiago ukan behar ginituzke, beraz beha egonen gira. Ezkontza: biga ukan ditugu. Lehena, Céline Bidart-ek hartu du laguntzat Ainciboure Christophe beskoitzarra eta herri hortan bizi dira. Bigarrena, Saldubehere David eta Oteiza Sophie, hauek herrian bizi dira. Biziki umore onean joan dira bi eztei hauek. Goresmenak eta xantza on bi bikoteeri. Sortze: Manexeneko Sandrine eta Jean-François Hirigaray familian muttiko ttipi bat, izendatu dutena Txomin. Desiratzen dugu bizitza luze eta uros bat sortu berriari. Goresmen beroenak aitameri bai eta aitatxi eta amatxieri. Kintoa kurri: biziki ongi joan da eguna denbora ona lagun. 136 pertsonek parte hartu dute, gizon ala emazte, 91k beren plazerrez egin dute. 21km-ko ibilaldia izan da irabazduna gizonetan: Bordenave Philippe 2 oren 9 minutu eta emazteetan Dernis Charlotte 2 oren 41 minutu.