Durangoko azoka (abenduaren 6tik 8ra) zanpa-zanpa hurbiltzen ari zaigu. Datozen hilabeteetan, euskal argitaletxeak agertuko dira, negu huntako liburuak aurkezten, bata bestearen ondotik. Baionako Euskal Erakustokian Maiatz elkarteak ideki du dantza, iragan astean, bi libururekin. Luzien Etxezaharretaren inguruan zeuden Itxaro Borda baionarra eta Piarres Aintziart heletarra. Piarres Aintziarten proposamena interesgarria da, egiazki. 2015ean Elkar argitaletxean plazaratu "Nafarroan Filosofatuz" lanaren frantsesezko itzulpena eskaintzen du erakasle ohiak Maiatzen, "Méditations Navarraises" tituluarekin. Santiagoko bidean ibiltzearen erruz, urratsean sortzen zaizkion pentsu eta burutazio filosofikoz osatua da, xendra horietan halatan Descartes, Nietzsche, Topet- Etxahun eta François Villon poetak gurutzatzen direla. Itxaro Bordaren liburu berria aldiz nobela bat da. "Kripton 85" izenburuarekin, eskualde ez finkatu bateko Darkbird zentral nuklearraren zartaketa eta honen ondorio humanoak harilkatzen ditu, happy end batez finitzen den bi emazteren arteko amodiozko istorio bat duela ardatz. Fukushimako istripua gertatu zen urtean izkiriatu zuen, 2011n beraz, zientzia-fikzio kategorian sailkatzen ahal dugun eleberri distopiko hau. Badugu beraz zer irakur eta zer goza. Ez huts egin!