Bizikleta ibilaldia

Ekainaren 9an igandearekin, herriko Lagunak bizikleta ibilaldi elkarteak antolaturik, bizikleta ibilaldiaren 13. edizioa iraganen da. Izan ere, hiru ibilbide desberdin proposatuak izanen dira, distantzia desberdinekoak. Urdazuri gimnasiotik abiatuko dira ibilaldiak (7:00). Bukatzean sariak banatuak izanen dira. Bertan, bizikleten aparkaleku segurua izanen da, baita jan eta edatekoa ere. FFVélo elkarteko lizentziatuek 2 euro pagatu beharko dituzte, besteek 5 euro.

Artha Katxi Tour

Ekainaren 9an igandearekin, Artha digaren itzulia antolatua da, igeriketan. Parte hartzaileek 3.300 metro egin beharko dituzte. Lasterketa hondartzatik abiatuko da (9:30). Izenak dion bezala, Katxi Klothing da ekitaldi hunen partaide. Izen emateak 32 euro kostatzen du, baldintza batzu bete behar dira igeri egin ahal izateko. Informazio guziak www.saintjeandeluz.fr webgunean.

“Euskarians Eguna” Integrazio Batzordearen alde

Ekainaren 15ean, euskal errugbiaren besta handia iraganen da. "Euskarians Eguna"-k egun guzian iraunen du: goizean (11:30-15:30) zazpi probintzietako errugbi VII txapelketa iraganen da, 18 urte petikoen mailan. Ondotik (16:00), Iparralde/Hegoalde selekzioen arteko lagunarteko nesken errugbi XV partida jokatuko da, Euskarians/Suitza Nazioarteko errugbi XV partidarekin eguna bukatu aitzin (17:30). Sarrera 5 eurotan izanen da, Integrazio Batzordeari, Seaskan ahalmen urriko haurrei eta familiei sustengua ematen dien elkarteari, emana izanen zaio.

Hondartzen zainketa

Ekainaren 1etik goiti eta iraila arte, herriko hondartza handia zaindua izanen da. Uztail eta abuztutik goiti, herriko 4 hondartzak zainduko dira, manera intentsiboagoan.