Bestak bururatuak!

Aurten ere besta arrakastatsuak izan dira, milioika jendek parte hartu baitute. Besten abiatzea bi tokitan egin da, "ofiziala" Herriko Etxeko balkoitik eta Baiona Tipian besta alternatiboak antolatzen dituzten elkarteek Xina ostatuko leihotik.

Karrikaldiak usaiako arrakasta ukan du, bai eta "Laborarien xokoak", euskal kulturak holako besta erraldoian bere lekua baduela frogatua izan da. Igandean, ohidura den bezala San Andres elizan banden meza iragan da, Iruñea eta Baionako Herriko Etxeetako hautetsien presentziarekin, Cristina Ibarro auzapez berria presente zen.

Lerro hauek idaztean, Baionako prokuradoreak ez zuen bestetan izan gertakarien berri emana. Sare sozialen bidez sexu erasoak eta bi bortxaketa iragan direla jakin da. Feminista mugimenduek, gertakarien salatzeko, bestetan elkarretaratzea deitu zuten.

Barthes: ura nundik nora doan

Agorrilaren 8an (9:00-12:45) Euskal Itsasbazterra egiturak antolatzen du "Barthes: ura nundik nora doan" deitu ekimena, Departamendua eta Herriko Etxea partaide dira.

Baionako ateetan, Ansoteko zelaia erregularki urperatua da, itsas mareen menpeko lurretan. Baionako hiriak ingurune naturala zaintzea eta kudeatzea bere gain ditu. Ibilaldi naturalista, toki horretan hitzaldiak eta jokoak proposatuak izanen dira, aitzin izena eman behar da: cpie.pays.basque@orange.fr.