Orotarik | 2023ko Agorrilaren 03a
Haziak idazle: MAITENAREN AMETSAK
Elena Irigoien SFX Kolegioa Uztaritze U4B1 bakarka lehen saria
Euskal Haziak elkarteak urtero idazketa txapelketa antolatzen du. Aurtengo lehiaketan ipuin baten segida asmatu behar zuten, 250 hitzetan gutienez, "Espazioa eta ametsak" gaiaren inguruan.
Arratsalde apal batez Maitena lanetik sartzen da. Egun gogor eta konplikatua pasatu du. Nekatua da eta buruan min du. Pentsatzen du bainu batek on eginen diola.
Bainugelara joaten da eta bainua prestatzen: ur bero beroa, xaboi lurrin goxo batekin eta liburu on bat. Maitenak maite du astrologia, planetak, izarrak eta zeruko elementu guziak. Irakurtzen duen liburua hortaz mintzo da eta Maitenari biziki gustatzen zaio.
Orduan plazerez urean sartzen da. Ur beroak berehala on egiten dio. Bere buruko mina laster partitzen zaio eta bere laneko problemak ahanzten. Bere gorputza lasaitzen da, bainugela guzian lurrin goxoa hedatzen da. Bainua aparrez betea da.
Orain Maitena prest da bere liburua irakurtzen hasteko. Badira jada bi egun Maitenak bere liburua hasi duela eta irakurtzen duena biziki maite du. Orain bere liburua irekitzen du, badu oraino erdia irakurtzeko, biziki kontent da eta irakurketa hasten du.
Liburuaren istorioak kondatzen du mutiko ttipi baten abentura. Mutiko ttipi horrek, Izar izena duena, bere bizia pasatzen du planetaz planeta, bertako jendeen bizimodua ezagutu nahiz. Bere bizi laburrean jadanik sei planeta ezagutu ditu, haien bizimodu diferenteak, jende diferenteak eta lur diferenteak. Orain gure planetatik hurbiltzen ari da. Egun Jupiter planetara heltzen da. Jupiter planeta oso bitxia da, zeren eta dena ura da. Jendeak, arrainak bezala, urpean bizi dira.
Maitena bere liburu eta ametsetatik ateratzen da bere ama entzuten duelarik oihuka. Maitenaren amak oihukatzen du, bere sukaldea uretan baita. Bere ametsetan Maitenak ahantzi du bainuko ura hestea eta ura bainugelatik atera da eta peko gela, non ama sukaldatzen ari zen, trenpatu du. Maitenak, bere Jupiterreko jendeak bezala, nahi zuen urpean bizi baina bere amak ez.
