Bilboko batzoki batean "Txapote wins" (Txapotek irabazi du) dioten eta EAJri "espainiarra" deitzen dioten pintadak agertu dira. Jeltzaleek erran dute "garai berriak" izan arren iraganeko "jokabide berak" direla eta "errespetuaren eta bizikidetzaren bidean tinko" jarraituko dutela. "Beste batzuk zein aldetan dauden erabaki beharko dute", gaineratu du.

PSNk, Geroa Baik eta Zurekin Nafarroak elkarrizketak berriz abiatu dituzte, Foru Gobernu berrirako akordio programatiko bat adosteko helburuarekin, agorrilaren 28ra begira, inbestidurarako azken eguna baita. Akordioan, alderdiek Gobernuan izanen duten pisua ere zehaztuko dute. PSNren ustez, akordioak hauteskunde orokorren emaitzak kontuan hartu beharko ditu, Geroa Bairen iritziz, bide orria foru hauteskundeek markatu beharko lukete. Maria Chiviteren inbestidurak EH Bilduren abstentzioa beharko du. Hala ere, gobernuaren osaketarako PSNk ez du koalizioarekin hitz eginen. "Geroa Bairekin eta Zurekin-ekin gobernu-programa prestatzen ari gara eta ildo horri jarraituko diogu". Arnaldo Otegik "zuhurtzia" eskatu dio Chiviteri. EH Bildu hauteskunde orokorretako bigarren indarra izan dela gogorarazi du, udal eta foru hauteskundeetan herritarrek Parlamentuan eta Iruñean gehiengo aurrerakoia izatea erabaki zutela defendatu du.

Asiako "Sari Handia" eskuratu du Landarbaso Abesbatzak, inoiz irabazi duen aipagarriena, Balin egin lehiaketan. Europako talde batek parte-hartzen duen lehen aldia da, euskarazko errepertorioak epaimahaia estonatzea lortu du.

1.822 eurokoa da Estatuko batez besteko hilabeteko lansaria, Euskal Erkidegoan baino %15,21 ttipiagoa. Molde horretan, Euskadiko soldatari batek 10 hilabete pasatxo lan egin behar du Espainiako batez besteko langile batek 12 hilabetean lortzen duen dirua eskuratzeko.

2023ko Kongresua Donostiako Kursaalean egin dute. Guzira 650 kide egon dira deituta hitzordu horretara. Korporazioko kooperatibek, 2022an, 10.607 milioi euroko salmentak ukan zituzten, aitzineko urtean baino %10,7 gehiago. Enpleguari dagokionez, batez besteko langileria 68.879 pertsonakoa da, emendapen ttipi bat ukan du. Azpimarratze beharreko beste datu bat, inbertsioen kopurua 347 milioi eurokoa da, oro har, aurreko urtekoa baino %11,8 handiagoa, Korporazioak ohar batean jakinarazi duenez. Bestalde Mondragonen "Ezagutza Dibisioaren egituraketa" izan da, dibisio berean integratzeko eta bere erakunde guzien arteko lankidetza bultzatzeko: ikastetxeak (Arizmendi Ikastola, Politeknika Txorierri eta Lea Artibai), Mondragon Unibertsitatea (bere hiru fakultateekin: ingeniaritza, enpresagintza eta humanitateak) eta zentro teknologikoak (Ikerlan, MIK, Lortek eta Leartiker). 11 erakunde eta 2.000 pertsona inguru biltzen dituen Dibisio berriak 150 milioi euro inguruko aurrekontua du,...

Agorrilaren 6an, Bizkaiko, Gipuzkoako eta Lapurdiko hamabost hondartzatan Etxerat elkartea mobilizatuko da, "Etxera" lelopean. La Arena, Bakio, Laidatxu, Laida, Laga, Ea, Lekeitio, Ondarroa (Bizkaia), Mutriku, Deba, Zarautz, Orio, Donostia, Hondarribia (Gipuzkoa) eta Hendaiako (Lapurdi) hondartzetan, senideek pairatzen dituzten egoerak salatu eta presoek eta erbesteratuek etxera itzuli behar dutela adieraziko da. Etxerat euskal preso eta iheslari politikoen senide eta lagunen elkarteak "gizarte osoaren eskubideak errespetatzeko" eskatu du. "Zorionez presoen sakabanaketa amaitu egin da eta egoera hobetu da, zalantzarik gabe. Hala ere, erregresioak itzultzen ari dira eta Auzitegi Nazionaleko sektoreek oztopo gehiago jartzen dituzte, egungo testuingurutik erabat kanpo dagoen mendeku gisa. Gure presoentzat ez dugu pribilegiorik eskatzen, eskubideak baizik". Etxeratek gaur egun, guzira 151 preso, 17...

Euskadiko Turismo Mahaiak lan-batzorde bat sortu du, Eusko Legebiltzarrak eskatuta, tasa turistikoa deritzona abian jartzea aztertuko duen foro honek, egonaldi turistikoen gaineko zerga ezartzeko orduan, kontuan hartu behar diren xehetasun guziak aztertuko ditu. Turismoaren sektorearekin lotutako gaiak jorratu dira, hala nola iraupen laburreko alokairuen Europako Erregelamendua, egonaldi turistikoen gaineko zerga bat aztertzeko lan-batzordea sortzea. Bestalde, sailburuak turismoaren egoera Euskadin aztertu du, urteko lehen sei hilabeteetako datuek (ekainean kanpinek erregistratutako datuak izan ezik, oraindik ez baitaude eskuragarri) adierazten dute Euskadi %14 inguru emendatu dela, 2022 urtearekin konparatuta.

Ministerioak Santa Maria de Garoñako zentral nuklearra desegiten hasteko baimena eman du. Segurtasun Nuklearreko Kontseiluak dionaz bi fase ditu, 2033ra arte iraunen du, 475 milioi euroko aurrekontua du, 350 pertsonak aldi berean lan egitea aurreikusten du. 1971n inauguratu zuten eta 2012ko abenduan sare elektrikotik deskonektatu zuten, Nuclenorrek Industria, Energia eta Turismo Ministerioari ustiatzen ez jarraitzeko erabakiaren berri eman zionean. 2013ko uztailean, ustiapenaren behin betiko gelditzea deklaratu zuten.

Gutien ustean, nunahi aipu dira presidente-hauteskundeak, bihar edo etzi behar balire bezala. Untsalaz, lau urteren buruan direlarik, lau urte ez arras. Macronek ere zonbait hitz bat-batean atera ditu gai hortaz. Edouard Philippe gobernuburu ohiari ustegabeko konplimendu zonbait eginez. Denek jakinki-eta hori dela jadanik hautagai agertu nahi direnetan aitzinatuenetarik batto eta beharbada aitzinatuena. Sustengu hori laguntza bat dea hautagai horrentzat ala izaitekoz traba bat, hori ez da oraino garbi, denborak erranen du. Bestalde, solasa da François Bayrou Paueko auzapeza ere berriz hautagai izaiten ahal litakeela. Laugarren aldikoz beraz, eta hor ikusten da zoin tematsu ditakeen. Berak dionaz adinarekin urtez urte zuhurtzia gehiago biltzen da eta horrek anitz munta omen du.Horiek hola, zonbat hautagai orotara? Goizegi da holako konduetan sartzeko, bainan itxuren arabera dozena bat berdin! Baitira hor gaindi apetitu xorrotxa dutenak, biziki...