Uztailaren 10ean iragan den Pirinio Atlantikoetako batzorde permanentean, 44 milioi euro baino gehiago engaiatuak izan dira. Horra nola eta zertarako baliatuak izanen diren:

Bizilekuentzat

Orotara, 1,5 milioi euro bozkatuak izan dira bizilekuentzat. Horietarik, 85.499 euro baliatuak izanen dira herri batzuetan ikerketen egiteko, Ipar Euskal Herriaren kasuan Ezpeletan, Azkaraten eta Itsasun. Departamenduak, 310.000 euro kostatzen duen Mugerreko 31 etxebizitza sozialeko proiektua segitzen du, Office 64 de l’Habitat-ren bidez.

Lizaga gazteluko mediatekarentzat

2021eko proiektuen deialdiaren baitan, garapen iraunkorraren alde itzuliak diren inbertsio proiektu eredugarriei Departamenduak laguntza ekartzen die. Departamenduko ordezkari hautetsiek 374.016 euroko diru laguntza bozkatu dute Lizagako gazteluan mediateka baten sortzeko.

“Terres de Jeux 2024”

Orotara, 166.382 euro bozkatuak izan dira “Terres de Jeux” proiektuentzat. Horietan, Getariak ezkerparetaren hegaztegirako (33.150 euro), Bidaxunek futbol zelai sintetikoa eta paddle tennis-a sortzeko (42.715 euro) eta Irisarrik “Erdoiza” deitu kirol gunea berriz antolatzeko (56.947 euro).

Lurraldeko proiektuentzat

2 milioi euro inguru baliatuak izanen dira lurraldeko proiektuentzat. Horietan, Arbonan lehen mailako eskola eraikitzeko (89.739 euro), Bidarteko Beheria antzokia berritu eta handitzeko (242.495 euro) eta Heletako eskolako korralea antolatzeko (10.519 euro).

Laborantzarentzat

Orotara, milioi bat euro inguru erabiliak izanen dira laborantzarentzat. Horietan besteak beste, 15.000 euro Akitania Berriko “aquacole” defentsa sanitarioarentzat (GDSA-NA), 550.000 euro kabalen defentsa sanitarioarentzat (GDS), 8.000 euro TREBATU elkartearentzat, 3.000 euro laborantzako enplegu eta formakuntza departamenduko elkartearentzat (ADEFA), 27.000 euro laborantza ekoizleen batasunarentzat (UPF), 32.000 euro Euskal Herriko laborari ekoizleentzat (APFPB), 27.000 euro euskal xerriaren saila garatzeko, 7.000 euro Irulegiko arno sindikatuarentzat, Manex buru beltzaren defentsa eta promozioa egitearen programa duen Buru Beltza elkartearentzat 5.000 euro eta Biharko Lurraren Elkartearentzat 30.000 euro.

Bizikleta bideentzat

Orotara, bizikleta bideentzat 300.000 euro baliatuak izanen dira. Horietan, Arrangoitzek 241.200 euro ukanen ditu.

Tokiko hizkuntzak

Azpimarratzekoa da ekainean iragan kontseiluan, tokiko hizkuntzentzat orotara 1,3 milioi euro bozkatuak izan zirela: okzitaniera, bearnesa eta gaskoia sustengatzen duten egiturei (151.390 euro) eta euskal kultura eta politika linguistikoaren garapenerako (1.202.000 euro).