Heriotze

Uztailaren 9an zendu da Marguerite Julien anderea, sortzez Dumora. Donibane Lohizunekoa zen bainan azken urteetan Bidarraiko Garaldea etxerat etorria zen bizitzera familiarekin. Arrunt azkenik haatik Donibane Garazin bizi zen. Minbiziak eramanik zendu da 67 urtetan. Haren hautsak gure hilerriko kolunbarioan ezarriak izan dira. Familiari doatzi gure agurrik zintzoenak.

Lapurtarrak abesbatza

Uztaritzeko Lapurtarrak koru mistoak kontzertu bat eskainiko du gure elizan agorrilaren 8an, ortzegun arratsez (21:00). 16 emaztek eta 14 gizonek osatzen dute korua. 1989an sortua den koru hau, gaur Yves Panizzolik du zuzentzen. Kantu sakratu ala profano, euskarazko ala munduko, publikoa xoratzekoa eskaintzen du beti Lapurtarrak abesbatzak. Sartzea: helduek 10€, urririk 16 urtez pekoentzat. Ongi-etorri deneri.

Herriko bestak

Arras ederki iragan dira herriko besten hiru egunak. 1.200 afaltiar ostiraleko zikiro jatean. 2.000ko bat sartze larunbateko kontzertuetan, besteak beste Sutagar eta Zea Mays taldeen entzuteko, artetik izan den eurialdi larriak moztura labur bat sustaturik, ez haatik gazteria beldurraraztekoa, bitartean Barberaenean gaitzeko giroa zelarik, bertsuak (Mizel Mateo eta Gillen Hiribarren) eta kantuak ozenki emanez. Eta igandean 450 bazkaltiar, Botakantu talde alaiak animaturik, ondotik “Behin bazen” dantza ikusgarri pollitaz ginela gozatzen, xiberotarrek emanik, haiekin zutela herriko seme Battitt Etxart dantzari ernea. Eta ezin hobeki bururatzeko, Gozategi eta Maskak musika talde suharrak. Bazen gozatzekoa.