Ezkontza

Xabi Etchecolanea eta Camille Bidegain gure herrian ezkondu dira. Iparragerreko auzoan bizi dira. Goresmenak bi gazteeri.

Pilota

Zaharrer Segi pilota elkarteak beste 4 xapel irabazi ditu Joko Garbi edo Atxiki Ttipian:

Helduen 1 maila: Iban, Teo Riouspeyrous anaiak eta Bixente Izoko 40/Noizbait 26.

Artekoak: Eneko Izoko, Thibault Garces, Peio Aurnague 40/Kapito Harri 30.

Gazteak: Antton Telletchea, Baptiste Bounine, Julian Juantorena 40/Goizeko Izarra 20.

Gaztetxoak B: Xan Trounday, Gabriel Massias, Freddy Ernaga Aurnague 40/Luzean 30.

Goresmenak deneri.

Herriko bestak

Agorrilaren 2tik 6ra (ortziraletik asteartera):

- Ortziralez, trinketean, pintxo gaualdi alaitua.

- Ibiakoitzez, Islan merkatua, bazkaria, arratsalde apalez elkarteen zintzur bustitzea, gauaz kontzertuak.

- Igandez, Arrolaren desfilea, presoen aldeko bazkaria Bixentainean, plazan arratsaldez Joko olinpikoak, Kiki Bordatxo, gauaz su ziriak, Holako De Luxe.

- Astelehenez, elizako plazan, esku huska partidak, herritarren bazkaria, gaualdia “Den bezala” ostatuan kontzertuekin.

- Asteartez, luze eta Joko Garbi partidak, gaualdia Bixentainian.

Xehetasun guziak besta komiteak etxeetara igorri dituen liburuxketan.

Agian, argazkian agertzen diren Maialen eta Xilbi baigorriar musikariek ez dituzte heien soinu tresnak aterbetu beharko.

Zirkulazio trabak

Herriko besten karietara, karrika nagusian zeharkatzea debekatua izanen da pilota plazaren heinean agorrilaren 4tik 5era (ibiakoitzeko 8:00tatik igandeko 8:00ak arte), eta agorrilaren 6an (asteartea, 8:00tatik 20:00ak arte).