Urtarrilaren 30ean, Euskadi, Nafarroa eta Akitania Berriaren arteko mugaz gaindiko lankidetzan diren Europako sei proiektu estrategikoak abiarazteko ekitaldia egin zen Iruneko Ficoban. Bertan, AFOMEFeko (Mendebaldeko Eremu Funtzionala) gobernantzako ordezkari instituzionalak, POCTEFA programaren arduradunak, Europako Batzordeko adituak, proiektuak zuzentzen eta gauzatzen dituzten talde teknikoak, tokiko erakundeak eta mugaz gaindiko lankidetzaren funtsezko eragileak elkartu ziren.

AFOMEF

AFOMEF esparruan, Lanean, Hezhi, Mugaziklo, Transfermugi, Eusguneak eta Sarebide ekimenek 2029 arte herritarren eguneroko bizitzan eragin zuzena ukanen duten ekintza zehatzak sustatuko dituzte enpleguan, mugikortasunean eta eleaniztasunean.

Horri esker, mugaren bi aldeetan lan egitea, ikastea edo mugitzeko aukera anitzez errexagoa izanen da etorkizunean.

Proiektuek kasik 23 milioi euroko inbertsioa biltzen dute mugaz gaindiko lurraldean, horietatik 14,8 milioi FEDER funtsetatik heldu da, INTERREG POCTEFA programaren bidez. Lurraldeek dituzten erronka komun nagusiei aurre egitea da xedea, baita Europako jarduera herritarrengana hurbiltzea ere, oztopo administratibo eta praktikoak kenduz, muga-efektua murriztuz eta jendarte eta lurralde kohesioa indartuz.

Sei proiektuak

Sei proiektuk erakusten dute mugaz gaindiko lankidetza tresna eraginkorra dela lurraldearen eraldaketan, ikuspegi berritzailea eta emaitza zehatzak uztarturik. Enpleguaren arloan, Lanean proiektuak mugaren bi aldeetan lan aukerak eskuratzeko dauden zailtasunei aurre egiten die, lan merkatuaren arteko loturak indartuz. Mugikortasunari dagokionez, Transfermugi egitasmoak mugaz gaindiko joan-etorri errexagoak, irisgarriagoak eta jasangarriagoak izatea du helburu. Mugaziklo, mugikortasun-eredu jasangarri, inter konektatu eta multimodala sustatzen ari da, bizikleta eguneroko garraiobide gisa kokatuz.

Hezkuntza eta hizkuntzen esparruan, Hezhi proiektuak eleaniztasuna bultzatzen du tokiko hizkuntzen irakaskuntzan eta ikaskuntzan, Euskadi, Nafarroa eta Pirinio Atlantikoetako komunitateen arteko hizkuntza oztopoak murrizteko asmoz. Komunikazioaren alorrean, Sarebidek euskarazko hedabideetan diren hizkuntza mugak gainditzea du xede. Azkenik, Eusguneak proiektuak euskararen erabilera eta ezagutza sendotzen ditu, mugaz gaindiko lankidetza sare baten bidez.