Pilotako finalak

Joan den larunbatean iragan dira gure herriko lehiaketaren finalak, esku-huska, trinketean. Jendea saldoan bildu da, guti aire hastapenean, aldiz azken finalarentzat trinketa tanpez betea zen. Lehiaketak lau maila bazituen, ondorioz lau final jokatu dira.

Laugarren mailan, Andoni Allot eta Cyril Arambel 40, Sébastien Ospital eta Tomas Landaboure 7. Hirugarrenean, Roger Etchevers eta Pierre Cedarry 40, Iban Casemajor eta Xalbat Bidondo 26. Bigarrenean, Xan Oronos eta Frantxoa Oteiza 40, Yannick eta Sébastien Franchisteguy 30. Eta lehen mailan, Patrick Ibarrola eta René Muscarditz 40, Eneko Ibarrola eta Mathieu Olhagaray 38. Azken partida hau zinez ederra izan da, gazteak luzaz aitzinean, xaharragoek hondarrik baizik ez dutelarik aitzina hartu. Dena den, goresmenak pilotari guzieri eta berezikiago Mathieu Duclos gazteari, hunek baitu plaza gizon saria eskuratu.

Ondotikako guzia giro onean iragan da, lehenik aperitifa trinketean berean, gero afaria Artetxea gelan, 90 bat lagunen artean, Andoni Berhouet sukaldari talendutsuak prestatua, eta azkenik musikaldia trinketean gau parte on batean. Eskerrak Jo Pilota elkarte antolatzaileko gazteeri.

Asteburuko hitzorduak

Jadanik aipatuak, ez ahantz bi hitzordu baditugula asteburu huntan. Bat ostiralean (19:00) Ortzaizeko Menta liburutegian, "Anti" filma eta Eneko Bidegainen mintzaldia euskal mintzairaz, Bidarraiko eta Ortzaizeko euskaltzaleek partzuergoan antolatua Euskaraldiaren karietara. Bestea igande arratsaldean (14:00), mus lehiaketa Arrume gela berotuan, herriko eskola publikoko burasoek antolatua.