"Labourdins" elkarteak 110 urte

''Labourdins'' elkarteak aurten bere 110 urteak ospatuko ditu. Iraupenean doan elkarte hau sortu zen beraz 1913an Uztaritzeko parropiaren gerizapean, Jean Blaise Adéma erretor eta Jean Elissalde ''Zerbitzari'' bikari zirelarik. Bultzatzaile ere izan ziren orduko bi hautetsi, Edmond Goyeneche eta Louis Dassance, asko urtez elkarteburu egonen direnak. Elkartea abiatu zen soinuaren inguruan, klika deitzen zutena, atabal, tronpeta eta kleronariekin. Gaur egun soinulari taldea beti azkar doa, musika tresna desberdin askorekin, errepertorio berriekin, Patrick Sistiague duela gidari 1980az geroztik. Asko ateraldi egiten ditu, lehiaketa batzuetan sari batzu ere irabazi ditu. Zonbait urte berantago 1920ko hamarkadan sortu zen zangobaloi taldea, urte pare bat arizanik gelditu zen. Berriz 1964an bultzatua izan da, gaur-egun Frédéric Degert-ek kudeatzen duena, maila eta adin guzietako jokolariekin, 340 lizentziatu dituela. Etxeparea zelaia osoki berentzat dute, trebakuntza eta partidentzat. Azken 20 urte hauetan gehitu dira ere elkartean bi abesbatza: Josteta gizonena, Serge Etchegoyen gidari eta Koloreak emazteena Caroline Phillips gidari. Elkartea kasik mende bat osoa hiru lehendakarik kudeatu dute: Edmond Goyenetche, Paul Dubosq eta Simon Telleria, azken dozena bat urte hauetan Fédé Ugarritzak segurtatzen duena, bainan hunek aurten eskua pasatuko du elkarteburu berri bati, nahiz ez den oraino izendatua. Ospakizunen egun nagusia izanen da beraz Salbatore eguna, besta hori du betidanik atxikitzen duena. Goizean (10:30) mezan elkartekide anitzek parte hartuko dute, soinulariak bertan ariko direla. Meza ondoan izanen dira omenaldi eta sariztatze batzu, zintzur bustitze eta bazkaria aitzin. Bazkariarentzat beharrezko da izenak emaitea lehenbailehen telefono huntara: 06-67-97-02-17 edo webgunean leslabourdins.opentalent.fr. Ospakizunek segituko dute ondoko egunetan 18tik 21era, kantaldi eta kontzertuekin (ikus egitaraua iragan asteko kasetan edo webgunean). Izan dezatela arrakasta ona eta elkarteari oraino bizi luze bat desiratzen diogu hemendik ere.

Astobiaga

Astobiaga guneari Herriko Etxeak freskoaldi eta berritzea eginen du ondoko hilabetetan. Toki hortan zuhaitz asko (zurtzuri karolinak bereziki) adin handikoak izanez, erituak ere dira. Botako den zuhaitz batentzat bi berri landatzearen politika segitu nahiz, ondoko astetan arbola erienak kenduak izanen dira eta beste batzu abarratuak. Etorriko diren bi neguetan 60 bat zuhaitz berri landatuak izanen dira: sahats, haltz, zurtzuri, burzuntz, urki eta astigar. Desberdintasun hori diotenaz izanen da biodibertsitatea zaintzeko egokiena. Herriko Etxeak oroitarazten du egur zaharren botatzeko denboran, toki hori autoeri eta ibiltarieri debekatua izanen dela, heldu den maiatzaren 2tik 19ra.

Informatika tailerra

CCAS herriko ekintza sozialen zentroak, San Josep lizeoarekin partaidetzan, antolatzen du informatika tailerra, maiatzaren 22an astelehena (14:00-16:00), lizeoko gela batean. Helburua da ordenagailu, tauleta eta eskuko-telefono ibileran gehiago ezagutza menperatzea eta trebatzea, nahi duenari laguntza berezia ekarriz. Argitasun gehiagorentzat eta izenak emaiteko, deitu CCAS telefono huntara: 05-59-93-38-91.

Elektrika mozte

Lan batzu segurtatzeko Enedis enpresak elektrika mozte batzu eginen ditu maiatzaren 17an asteazkenez (9:00-15:00). Hunkitu guneak dira Heraitze auzoa eta Goxoki etxegunea. Kondutan hartzekoa.