Hartzaro festibala

Gainean dugu kasik aurtengo Hartzaro festibala, abiatuko dena larunbat huntan Kaskaroten bisitarekin Baionan. Festibal iraupen osoan bi erakusketa egonen dira, lehena ''Bai ala bai'' mediatekan emanen dena eta bigarrena ''Art'Zaro'' Lapurdi gelan egonen dena. Bi erakusketak bisita daitezke urririk. Festibalaren egitaraua hauxe da: otsailaren 22a larunbata: Arruntzan Kaskarotak etxez etxe; (14:30) Lantz dantza ikastaldia Erdiko Etxean urririk; (20:00) Bilgunen Altxalili kolektiboa Atharratzeko Bekat'Uros egunean 2022an sortua eta ondotik Kalume ikusgarria. Sartzea 15 euro. Igandea 23a: (9:00) San Mixel eta Etxehasia auzoetan Kaskarotak etxez etxe; (11:00) Heraitzeko plazan Ur Begi danborrada eta 11:30etarik goiti Kaskarotak, ganixak eta mutxikoak; (17:00) Santa Katalina kaperan Amilotx emazte kantari laukotea. Sartzea libro. Osteguna 27a: (19:00) Hiribehereko pilota plazan tutak, gaiteroak, perkusioak, Afrika danbo, Zirtzilak eta Izartxoko dantzariak; (20:00) kantu gaua alaitua Latsa elkartean. Ostirala 28a: (19:30) Lekittoko Deabruak taldearen desfilea Hiribeheretik Purgura; (20:00) kontzertuak Purguko plazan, Diskobolo, Aho Zakil Konekxion, Kode eta SFM taldeekin. Sartzea 10 euro. Martxoan larunbata 1a: merkatu plazan 10:00etarik goiti Izartxo dantzak eta mutxikoak Erdizka taldearekin; (19:00) Kiroletan musikaldiak: Burrunka, Kamelia eta Aguxtin Alkhat eta Aukeran. Sartzea 15 euro. Igandea 2a: (8:00) Kaskarotak Hiribeheren, Sokorrondon eta Purgun; (10:00) Latsa elkartean Txilindron sukaldaritza lehiaketa, aspaldian arrakasta ona biltzen duena, bazkari batekin segituko dena 25 eurotan, izenak aitzinetik emanez latsa.uztaritze@orange.fr, Jarauta 69 taldeak alaiturik; (17:00) Arberoako txaranga eta (19:00) Ixtaklok taldea Latsan hauk ere urririk. Astearte goizean 4a: (17:45) Tukutun txalaparta Hiribeheren; (18:15) Uztaritzeko ihauteriak, desfilea Purguraino, Zanpantzarren auzia eta ondotik erromeria karpapean Kiki Bordatxorekin. Egun oroz ikusgarri horietan jan-edariak segurtatuak izanen dira tokian berean. Ez da dudarik egitarau aberats horrekin nork berak aurkituko duela gustatzen zaion ikusgarria. Festibala on guzieri.

Pilota

Labur joan da Kapito Harriko pilotarien bidea ezkerparetetan joko garbin Frantziako xapelgoaren kondu bederen helduetan. Joan den ortziralean finalerdian, A mailako gure pareak galdu du Kanbon, Hazparneren kontra 20/40. Larunbatean helduetan beti Kiroletan B taldekoek ere galdu dute Senpereren kontra 35/40. Gelditzen dira bakarrik artekoak eta gaztetxoak asteburu huntan jokatuko baitituzte beren finalerdiak Angelun El Hogar plazan. Suerte on haieri.