Lagun batzuek galdegin didate:"Zu, abertzalea izanki, nolaz Ukrainaren alde zaude gerla horretan?". Hona erantzuna: abertzalea izan aitzin, jende bat naiz, beraz jendetasunak gidatu behar nau oroz gainetik. Gerla ote dugu ezadostasunen konpontzeko manerarik hoberena? Abdelkader pastoralean erran nuena errepikatzen dut hemen:

"Gerlak ez dü okerrik xüxentzen /errausten dü deüs eman gabe"

"Galtzaleak ez düke bakerik / arrabantxa bat hartü arte."

Errusiako armadak sua piztu zuen Ukrainan sartuz, eta zer irabazi du? Hiru urtez kilometro zenbait hartu, milioi bat hil eta kolpatu larri egin bi aldeetako gudarien artean, zibilak bestalde, beretu nahi zuen Ukraina xehatu, iheslariak milioika dela erresuma barnean, dela kanpoan, bien ekonomia errekan, herra bi populu haurrideren artean. Hori guzia handi nahiagatik. Errusia lur eskasean ote dago? 27 aldiz Frantziaren eremua betetzen du! Hara jendetasun soilak erraten didana.

Orain abertzalearen aldi. Donbass eskualdeko jendea minoria nazional ukatua ote da? Ez dut uste. Ukrainarra da, eta parte bat Errusiako herritar egin nahi omen errusieraz mintzo delakoan. Haatik ukrainar guziek errusieraz badakite, inperioko hizkuntza baitzuten, ukraineraren gainetik inposatua. Errusiak Ukraina kolonizatu zuen hiru mendez. Azkenean Sobiet Batasunaren desegiteak libratu du. Baina Errusiari bizkarra emanez, Europari hurbildu zaigunean, Putin-ek ez du onartu. Gerlaz erantzun dio, lehenik Krimea hartuz 2014an, gero Donbass eskualdera soldadu maskatuak igorriz milaka, tankeak ehunka, azkenean armada osoak Ukrainan sarraraziz 2022ko otsailaren 24an.

Gainera Putinek errusiar inperioa lehengo eremura zabaldu nahi du. Auzoko erresumak horren beldurrean bizi dira. Errusiaren janizatik zaindu nahiz, OTAN erakundean sartuak dira banan-banan. Errusiak luzaz bere peko hartu baitzituen bortizki, horren aztaparretara itzultzeko tirriarik ez dute. Haatik Ukraina gaixoa OTANetik bazter dago, Alemaniak, Amerikak eta Frantziak hola erabakirik. Baina gerla horren kariara, beste bi erresuma aliantza horretan sartu dira, Finlandia eta Suedia. Bitxiki, Putinek ene jakinean ez du gauza handirik erran, ez da gehiegi kexatu, zergatik ote?

2008 urtetik Putin Sartaldearen aurkako kurutzada batean sartua zaigu, ez du gordetzen. Europako batasuna desegin nahi du, OTAN erakundea bistan dena, baita Estatu Batuetako Amerika, ez gutiago. Azken hau franko nahasi berri du Trump presidente berriaren bitartez. Haatik hurbilena Europa du, beraz kasu guri. Ukraina har baleza, non geldi litaike?

Errusiar tankeak nekez hel daitezke honaraino, baina holako balentriaren egin beharrik ez du Putinek. Bere aldeko jenderik ez du eskas Europan gaindi, bereziki eskuin muturreko alderdietan. Zinez laguntzen ditu, eta boterea har balezate gure gainetiko erresumetan, errusiar inperioaren meneko gerta gaitezke. Hori ote da gure ametsa, irrika, tirria? Abertzale izan ala ez, beste xederik badukegu anitzek.