Heriotze

Baigorriar guziak inarrosi gaituen berri latza: Bastida Berroko Patxi Errotabehere frango gazte zendu da. 56 urte zituen. Burumuineko tumore batek bi hilabetez ereman du. Dolumin bizienak Agnes bizilagunari, Elaia, Laida, Kleina alaberi, Christiane eta Ttotte aitameri, Maddalen eta Antton arreba-anaieri eta penetan den familia guziari. Ehorzketako meza joan den astelehenean iragan da Baigorriko elizan eta egun hortako besten programa ezeztatzea erabaki dute gazte antolatzaileek. Jakin behar da gainera, Patxi zenaren alabak besta komiteko partaide direla.

Idortea

Idorte alerta zabaldua izan da gure herrian. Edateko uraren erabilpena zaintzeko, auto garbitzeak, baratze edo lorategi ureztatzeak eta pizina edo igerileku betetzeak murriztuak dira orainokoan. Murrizketa horiek errespetatzen ez dituzten partikularrek 1.500€-ko isuna edo prozedura arriskatzen dute eta 7.500€ profesionalek. Gure herrian bete behar diren neurri guziak aurkituko dituzue VigiEau webgunean (vigieau.gouv.fr).

Kantaldi

Nekez Ari gizon abesbatzak kantaldia emanen du ortzegun huntan (agorrilaren 6an), Baigorriko elizan (21:00). Sartzea 10 eurotan, urririk 16 urtez petikoentzat.

Feria eta xakur

Udako bigarren feria gastronomikoa igandean (agorrilaren 9a) iraganen da trinketaren aitzinean, tokiko laborari eta artisauen parte hartzearekin. Karia hortarat, artzain xakur txapelketa jokatuko da ondoan den errugbi zelaian. Goizez (10:00) kalifikatzeak eta arratsaldez (17:30) txapelketa nagusia.

Margo erakusketa

Ortzadarra elkartean bilduak diren Baigorri aldeko margolari artistek heien obrak bi egunez erakutsiko dituzte Herriko Etxeko korralean, ibiakoitz eta igandez (agorrilaren 8 eta 9an).