Eusko Jaurlaritzak 2017ko Aurrekontuak onartuko ditu PPren abstentzioari esker. 2017rako 11.059 milioi euroko aurrekontu proiektua aurkeztu du Jaurlaritzak, jaz baino %1,2 handiagoa (126 milioi). Ezadostasunak gelditzen dira Madrilgo gobernuarekin, bereziki kupoari buruz.

Bizkaiko Lurralde Auzitegiak xuritu ditu torturatzeaz akusatu eta epaitutako lau guardia zibilak, salaketa berresteko froga onargarririk ez dela argudiatuz.

Alde guzietan eta molde berezi batez nazioarteko prentsak txalotu badu bakegileek antolatu operazioa, ez da denen iritzia berdina.

Bakea egitea, gerla egitea baino zailagoa dela errepikatu dute bakegileek zeren bakea ez da bortizkeriarik-eza bakarrik. Larunbateko baitezpadako urratsaren ondotik, beste zenbait, zailagoak, gelditzen dira egiteko.

Korrikaren aurtengo 20. edizioak ezin hobeki bururatu du Iruñean bere ibilaldia: 11 egunez, Euskal Herri guzia alde batetik bestera zeharkatu ondoan, zazpi herrialde, 2.557km, 46.200 parte hartzalerekin.

Axpeko Etxebarri Erretegiak seigarren postua lortu du "Restaurant" aldizkariak egiten duen 'Munduko 50 jatetxerik onenak' zerrendan.

Jose Miguel Etxeberria 'Naparra'ren gorpuzkinak aurkitzeko ahaleginak egin dituzte Landesetan, bainan ez dute arrastorik aurkitu.

Eusko Jaurlaritzak merkataritza bulego berria ireki du Londresen, hain xuxen 'Brexit'ak dudak eta zalantzak eragiten dituen garaian euskal enpresen esportazioen jomuga nagusietako bat Erresuma Batua da, lehenbiziko 5 postuetan kokatzen dena.

1.433 langabe gutiago zenbatu dituzte martxoan Hego Euskal Herrian, aitzineko hilabeteko datuekin alderatuz. Orotara 178.510 pertsona baziren martxoaren ondarrean lanik gabe. Autonomia Erkidegoan 138.157 pertsona zenbatu dituzte langabezian martxoaren ondarrean, otsailean baino 1.066 gutiago.

Legediak hiru zonalde onartzen ditu Nafarroan euskarari buruz: zona euskalduna, mixtoa eta hala ez dena. Dagoeneko, zona mixtoko 154 herrietarik 35ek galdatu dute zona euskaldunera pasatzea, euskararen irakaskuntza ikastetxetan bultzatzeko.

ETAren armagabetzearen operazioa ongi iragan da. Apirilaren 8a egun haundia izanen da historian. Sei urte borroka armatuari uko egin ondoan, ETAk armak bere asmoz polizaren esku utzi ditu.