Euskal diaspora | 2017ko Ekainaren 08a
Garona errekaren ondoan Bordeleko Euskal Etxeak ezarri sagarnotegia
Joseba Etxarri
70 urte bete ditu eta ongi bete ere Bordaleko Euskal Etxeak.
BORDELE, FRANTZIA
70 urte bete ditu eta ongi bete ere Bordaleko Euskal Etxeak. Horren ospatzeko, hiriarekin bat egin dute, hiriko elkarte gisa heien presentzia izateko herritarren artean, eta Euskal Xoko eta sagarnotegia ukan dute Garona ondoan pintxoak eta sagarnotegiko menuak zerbitzatzen; eta Euskal Etxearen egoitzan ere standa ezarri dute, jendea komitatuz Eskual Etxera euskaldunekin bat egitera, euskaldunek besta ospatzen duten moldean ospatzera. Bistan da, euskaldunen manera huntan musikak, kantuak, dantzek, jate-edateak eta giro on eta alaiak ukan dutela parte garrantzitsu bat, euskaldunen molde eta besta giro tradizionala baita Eskual Etxeak eskaini duena hondarreko bi asteburuetan, erran bezala Garona ondoko stand-ean eta Eskual Etxean berean.
OPARI TRUKEA
Iragan asteburuan, gainera, etxekoekin batera helduak ziren komitatuen artean Pariseko Euskal Etxeko presidenta, Sebastien Daguerre, eta Eusko Jaurlaritzako Kanpoan den Euskal Komunitatearentzako zuzendari Gorka Alvarez Aranburu, eta bere bulegoko Manu Meaurio teknikaria. HERRIA ere hor egon zen, lekuko, eta besteak beste ikusi du Pariseko eta Bordaleko euskal etxeek elgarri eman dioten oparia, bisita eta urteurrenaren karietara; eta Eusko Jaurlaritzak Bordaleko Euskal Etxeari --David Mugica hartzaile-- emaniko oparia, Jose Antonio Agirre Jaurlaritzako lehenengo lehendakaria aipatzen duen faksimil bat. Hori guzia giro ezin hobean, aroak eta euriak iragan ortziralean errespetatu baitzuten elgarretaratzea.
MUNDUAN GAINDI
Eta Diasporako beste leku batzutan heldu den asteburuan gertatuko direnetarik batzuk aipatzeko, erran dezagun Argentinako Mar del Platan, euskaldunek Dantzari Ohiaren besta ospatuko dutela, aspaldi dantzari izan zirenak bildurik, dantzaria beti baita dantzari, talde batean ez dantzatu arren, diote. Buenos Aires hirian triki poteoa ere eginen du Euskaltzaleak elkarteak San Telmoko karriketan barrena. Eta Estatu Batuetako Winnemuccan, Nevadan, asteburu osoan euskal piknik eta besta eginen dute, dantzariekin, euskal musika, bildoskia eta barbakoarekin, Euskaldunak Danak Bat euskal etxea antolatzaile.
