Joan den ostegun goiztirian Kabul Afganistango hiri nagusiak atentatu berri bat jasan zuen. Kamioi bat lehergailuz betea zapartatu zen Alemaniako enbaxadategiaren parean.

Joan den ostegun goiztirian Kabul Afganistango hiri nagusiak atentatu berri bat jasan zuen. Kamioi bat lehergailuz betea zapartatu zen Alemaniako enbaxadategiaren parean. 80 presuna bederen hilik utzi ditu, zaurituak 350 baino gehiago. Kabul hiri nagusiko auzo batean aurkitzen dira mundu guziko estatuen enbaxategiak. Badu hiruzpalau urte atentatuak urrunagotik edo hurbilagotik jasaiten dituztela. Nahiz gehienetan ez dakiten garbiki nor den atentatu egilea, sei metro gorako paretak eraikiak dituzte ordezkaritza horien inguruan, metalkiez indartu betoinezko paretak hain zuzen. Pareta horien kaskoak salbe zakuz hornituak dituzte, eta hauen gainean burdin hari ziztadunak landatuak dituzte. Gauza da inork ez dakiela zehazki zenbat talde armatu ari diren Afganistanen atentatuak burutzen. Adituek bi izen emaiten dituzte lehenbizian, Talibanak eta DAECH. Talibanek galdatzen dute amerikar soldadoak Afganistandik atera daitezen, aurten kanpoko estatuen enbaxategiak dituzte beren atentatuen helburu. DAECH aldiz Xiiten kontra ari da: iazko uztailean 80 presuna hil zituzten Hazara etniakoak. Duela bi hilabete mezkita xiita batean otoitzean ari ziren 27 musulman hil zituzten.